Si son dâts dongje parcè che “la specialitât de Regjon no je mai stade cussì tant sot atac”: par chest un trop di sindics e aministradôrs locâi a àn aderît al Pat pe Autonomie, une iniziative politiche che a vûl meti dongje ducj i furlans intune “coalizion teritoriâl”. I protagoniscj di cheste gnove aventure – presentade al inizi di Otubar a Udin – a son lâts indevant parcè che “l’avignî des comunitâts al è inciert e malsigûr, al è un dovê precîs di noaltris che o sin stâts elets dai citadins, chel di cjalâsi ator e di difindi, di promovi e di slargjâ i spazis de democrazie partecipade. Prime che al sedi masse tart”. Peraule di Massimo Moretuzzo, sindic di Merêt e pont di riferiment di cheste galassie furlaniste di sindics che a àn decidût di bati un colp. E di fâlu (biadelore) lassant in bande i partîts talians (di çampe o di drete che a sedin) e lant a stiçâ un procès di agregazion intor di une idee di politiche che e partìs dal teritori.
IL SBURT
Ce sburtial un grum di sindics a no stâ bogns a spietâ che la Regjon o il Guvier al difindi la nestre autonomie? “Prin di dut – al dîs – la necessitât di difindi la stesse esistence de Regjon: dopo che si à fevelât tai ultins mês di progjets che a volevin ingrumâ il Friûl intune Macroregjon cul Venit, tes ultimis setemanis e je stade une acelerazion che prin e à sburtât il cjâf grup dal Pd ae Cjamare Rosato e il segretari de Leghe Nord Salvini a pandi il lôr favôr par cheste operazion, e po un ordin dal dì in Senât al à impegnât il Guvier in cheste direzion. Di front a dut chest, i partîts talians a tasin o a barbotin. Nô no tasìn, anzit: o vin dite “cumò vonde!”. Nus tocje cjapâ in man il destin de democrazie intai nestris paîs”.
CITADINS LONTANS
Il probleme di fat par Moretuzzo e pai aderents al Pat nol è dome il Friûl sot atac, ma il stes valôr di une azion politiche simpri plui lontane dai citadins: “la int e je fûr di ducj i procès decisionâi – al spieghe Moretuzzo – e e sint che la sô partecipazion no conte nuie. Parcè varessie di lâ a votâ?”. Di fat e sta a cjase, sglonfe di rabie cuintri i anei debii dal sisteme (i imigrâts) o cuintri il sisteme stes (la politiche): “almancul fin cuant che no sintarà di vê une rapresentance crodibile, che e resone no dome di cemût rivâ a otignî consens ma ancje di un gnûf model di svilup dal teritori”. Il Pat duncje al à la ambizion di meti dongje ator dai sindics, des associazions, di personalitâts di nivel dal mont de culture, une vere “coalizion teritoriâl che e fasi viodi ai partîts talians che achì no si passe, che il Friûl nol vûl jessi tiere di eletrodots o di svincui di autostrade fats par menâ la curint in Venit e la int ae Ikea. Par dutis lis sieltis, des riformis de Costituzion aes infrastruturis, des politichis sui servizis a chês su la industrie, al à di jessi clâr che e covente une consultazion cul teritori. E se i rapresentants dai partîts talians a son masse timits tal difindi i interès dal Friûl, al covente cualchidun che lu fasi al lôr puest”. Vonde jessi sotans: “vuê a son chei che a son renzians, salvinians o alfanians: nô o sin prin di dut furlans”.
IN CERCJE DI SIGURECIS
E ai furlans cumò ur covente la sigurece di jessi ancjemò une entitât: ma cheste sigurece cumò no le po da plui nissun, tocje dâse di bessôi. “O sin intun moment – al siere – dulà che la rapresentance politiche e clope, e lis mancjancis dal sisteme a puedin pardabon puartânus a jessi glotûts di teritoris plui grancj e di multinazionâls forestis cul cjâf ator pal mont. Il Stât talian nus considere dome nodârs o daziârs, ma lis comunitâts che nus àn sielzût nus domandin ben altri. E nô sindics o volìn jessi bogns di difindilis e di creâ lis cundizions par lassâlis miôr di cemût che lis vin cjatadis”. ❚
✒ Walter Tomada
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +