Futûr in primis

La peraule futûr e sta par chel che al vignarà, timp o tart. E clame ce che ancjemò no si pant, ma al è pussibil che al sucedi. No si trate, dut câs, di une predizion parcè che nissun al rive a savê di precîs ce che al capitarà fra un minût o, piês cun piês, doman.
In relazion ae presince di une persone in chest mont, il futûr al segne il sô impegn e la tignince par stramudâ i desideris in gnovis esperiencis.
◆ Magari cussì no, chest tiermin nol ven sparagnât de retoriche. Al è doprât par prometi, convinci, vendi, consolâ. Lu cjatìn tal mieç dai sprocs politics, tes promessis dai messaçs publicitaris e nol mancje tes argomentazions che a proclamin la inovazion ancje cuant che no si rive a viodile nancje cul binocul.
Al è doprât tantis voltis, e dispès cussì a sproposit, corint il pericul di tradî la idee di fonde: figurâ l’avignî. Di fat nol pues inverâsi cence un obietîf, cence l’impegn continui par otignîlu, i progjets, la dissipline, lis relazions interpersonâls e un continui di sieltis e decisions, par altri no simpri buinis.
◆ Il futûr nol è nancje un afâr gjenerazionâl; di fat, nol à une etât massime parcè che ducj a puedin fâ in mut di metilu dongje. Une vore di personis maduris, o intimpadis, si fissin invezit di volê vivi dome dì par dì; no si figurin un mût di jessi disavuâi, a restin persuadudis che il timp just pal cambiament al sedi bielzà passât o che mai al vignarà. Si platin inte nostalgjie, si lassin lâ, a sbassin il cjâf convintis che un puartament cautelôs al fasi sghindâ i pericui. Tant che no si sintin obleadis, come che al sarès naturâl, di judâ i zovins a tirâ fûr lis lôr aspirazions e sburtâju a deventâ indipendents biel prest.
◆ Ducj o vin cussience di vivi intun timp di crisis di ogni fate (climatichis, economichis, gjeopolitichis, sociâls), di precarietât, di une schirie di imprevedibilitâts che no dan padin. Lis informazions nus strissinin vie a une velocitât tant grande che nol reste timp par analizâlis, par pensâi sore e mantignî fiducie te nestre saldece.
◆ Par cuintri, il vêr pericul al è un altri: une societât che si dismentee di figurâsi e progjetâ il so futûr si disprive de pussibilitât di cambiâ un presint scjars o inacetabil. Intindiments e prospetivis gnovis, brame di cambiament, gnûfs stîi di vite a partin dome ben par ducj, ancje a chei che no àn il slanç di frontâlu cul cerneli dret.
◆ No si trate di un otimisim ingjenui che al ignore lis dificoltâts, ma di une necessitât pastanade cu la sgrimie che ducj o scugnìn tirâ fûr za dome par campâ; bataiâ al è za te nestre nature. Dinsi di fâ par continuâ a gjenerâ il futûr tal presint. Dome nô o sin i responsabii dal vivôr de societât. ❚