Tai ultins agns, in ocasion di masse torneus di balon, si è difondude la mode di fâ la “coppa chiosco”. No ai voie di voltâ par furlan il non di cheste cope parcè che e à za ruvinât avonde i nestris zovins, no stin permeti ancje che e sporcji la nestre lenghe. Clamìnle cul sô non: une porcarie.
◆ Si trate di une gare li che lis scuadris di balon e i lôr amîs si sfidin a bevi plui biris.
◆ Chestis iniziativis a àn cjapât pît, e chest nol è par nuie biel. I dams magari cussì no a son incalcolabii, di svariade nature e a concorin a puartâ in piês la situazion simpri plui grivie de plaie dal bevi; evidente e preocupante in maniere particolâr intai zovins.
◆ Fevelìn clâr, chi no si trate di int che e bêf parcè che e à problemis, ma di stiçâ a cjapâ la cjoche, rindile un event frecuent, fin a rivâ a calcolâle la normalitât.
◆ La aministrazion publiche che e lavore sui programs di recupar dai alcoliscj, tal stes timp, e permet iniziativis dal gjenar, in cualchi câs adiriture lis sosten. E varès invezit di mantignî lis distancis in maniere clare, eliminant cualsisei forme di aiût economic, struturâl, ancje chel verbâl, fintremai chel tasût ma che si concretize intai fats, tai confronts di chês associazions che lis organizin.
◆ Intervignî sui organizadôrs in maniere convinte par stimolâju a cambiâ strade. Chest al volarès dî fâ pardabon alc pe int.
◆ A volê pensâ mâl, al vignarès di crodi che al pai fâ la biele figure di une aministrazion che e cîr di recuperâ lis personis cun dificoltâts che a tocjin il bevi, ma che tal stes timp al convegni guviernâ un grum di cjochelis. ❚
Un usance no biele
Luca Bertossi
