Lis “certificazions” a contin une robe,
i fats a dimostrin une altre
Il turisim intal timp, graciis al mudament socioeconomic, ae plui grande disponibilitât di timp libar e bêçs e al disvilup dai mieçs di comunicazion, al è deventât une ativitât simpri plui sparniçade e pervasive. A chest al à contribuît ancje dute la propagande che e ven puartade indevant midiant dai mass media indreçâts e paiâts di cui che al à dut l’interès a pocâ il turisim tant che conditio sine qua non, cul messaç “Chi tu âs di jessi ancje tu” par fâ rivâ int intun puest particolâr par dopo mostrâlu via web par jessi cool (“figo”, disìn cussì). La esposizion sul web, po dopo, e poche ancjemò di plui il turisim, par chest e je favoride dai sogjets interessâts. Fra di chei, clâr, a son ancje i ents publics che a àn disponibilitât di bêçs e che a mostrin il turisim tant che une ativitât “idiliache” che e fâs ae int e al ambient.
◆ Pôc timp indaûr e je saltade fûr la gnove, pompade su dutis lis televisions e su tancj altris mieçs di comunicazion, che Sauris al à ricevût la certificazion di sostignibilitât dal Global Sustainable Tourism Council (une organizazion te suaze des Nazions Unidis che e fisse e che e gjestìs i standards pai viaçs e il turisim sostignibii a nivel globâl promovint pratichis turistichis responsabilis) e duncje, e uficialmentri deventade une destinazion turistiche sostignibile certificade in maniere uficiâl.
◆ A chest, si zonte che la certificazion i da a Sauris une credibilitât internazionâl fuarte, intercetant il segment dal turisim cussient, che al è in cressite, e conformant Sauris ae Diretive Europeane “Anti-Greenwashing” che e proviôt controi rigorôs su lis declarazions ambientâls. Intai servizis e articui che a tratavin la cuistion, clâr che chest fat al è stât enfatizât disint che Sauris al è “sul cuviert dal turisim sostignibil”, che e je une comunitât “brave e biele” e che in Italie a son dome 21 “destinazions” turistichis a vê otignût la certificazion (in Regjon al è ancje Tarvis).
Passant des cjacaris ai fats, viodìn ce che al è stât fat pardabon in cont de sostignibilitât.
◆ Tai prâts di Sauris Disore e je stade ristruturade e slargjade une piste di schi, fats un implant di inevament, un bacin (di dimensions di rimarc pe zone) par vê aghe di doprâ par fâ nêf e lis relativis infrastruturis. Tal stes moment al è stât tirât sù un fabricât intune zone di campagne par ûs comerciâl.
Al è stât fat un implant a cuarde (chê che a clamin “zip line”) par che lis personis a puedin butâsi jù di un çuc sore il Lâc di Sauris fin ae une des sôs rivis.
Al è stât cimentât un toc sore de rive dal lâc (dongje li che di pôc al è stât fat sù un fabricât intune zone che no veve) e intune aree plui grande lenti ator e je stade taiade la vegjetazion, cjapâts dentri arbui vecjos ancje distants dal intervent.
Buine part des stradis che a van sù pes monts traviersant boscs e passons a son viertis al passaç di ducj, cun cualsisedi mieç.
◆ Di Invier al è organizât il transit (ancje cul scûr) cun motoslitis ancje pes stradis forestâls che a traviersin boscs rivant fintremai tai passons.
Mi fermi achì.
La campagne di Sauris Disore e je la zone rurâl dongje di un paîs a cuote plui alte in Friûl. Chest al compuarte che sedi a nivel paisagjistic che biologjic e ecologjic (presince di speciis in cundizions particolârs e consecuentis interazions peculiârs fra di chês) e rapresenti alc di specific che al va difindût e conservât, e chest al è alc che ducj a puedin capî.
◆ Il bacin al è cercenât di cartei che a visin (i oms) de pericolositât di passâ la spaltade che e cor ator ator sore da la aghe, ma lis carateristichis costrutivis e i materiâi doprâts a causin la muart di anfibis che, dopo jentrâts te aghe, no rivin plui a saltâ fûr. Dongje di chest, il bacin al ven svuedât cuant che a son i cudui, che cussì a son destinâts a murî li dentri, zontant mortalitât a mortalitât: une mortalitât, cun di plui, che no je imediade ma che e ven a planc e cun patiments pai animâi.
Une o plui cuardis tiradis tal mieç di un ambient naturâl, di là di jessi un element estrani che al perturbe l’ambient, a son un pericul grant pai animâi che a svualin.
Cimentâ une rive di lâc, taiâ arbui vecjos e puartâ trops di int dulà che no lavin, al è intuitîf facil di capî che nol sedi mantignî un stât di naturalitât e tant mancul fâ sù fabricâts.
Lassâ viertis tantis stradis al puarte une incressite grande dal disturp e dal incuinament. Tal specific, schiriis di motocicliscj, cjapâts dentri chei che a vegnin di Austrie, Gjermanie e altris Paîs, a van sù e jù pes monts balinant dulà che a vuelin, ancje cuant che te pratiche a son nome lôr ator e in periodi riprodutîf dai animâi.
◆ Di Invier, lis motoslitis ator pai boscs e pai passons a son un fatôr che al pese a fuart su la vite dai animâi bielzà provâts dal Invier, intun lûc là che cheste stagjon nol à lis cundizions de plane furlane.
Par che une ativitât e sedi sostignibile, une opare no pues promovi e/o favorî la muart: al è un cuintrisens. La muart di anfibis, che a son un grup di speciis menaçât a nivel mondiâl e che, cun di plui, a rientrin te faune di interès protezude de Regjon Friûl-Vignesie Julie e, par tant, e à di jessi eliminade se si vûl fevelâ di sostignibilitât. Di chest, cui che al scrîf al a visât in maniere uficiâl sedi cui che al à di vuardiâ che cui che al à costruît il bacin, furnint ancje une soluzion facile par provâ a diminuî la mortalitât e dant la sô disponibilitât par risolvi i problemis (ma fin cumò nol è stât fat nuie).
◆ Te stesse maniere no si pues lâ a incidi sul ambient distruzintlu, incuinant e puartant int a fâ confusion pardut, fint insom des monts, se si vûl fevelâ di sostignibilitât.
Ducj chescj argoments e altris (par es. la oportunitât di sburtâ il schi in periodi di riscjaldament globâl) a mertaressin di vê un aprofondiment che, par fâle curte, chest in dì di vuê nol è pussibil.
Duncje, tornant ae cuistion: chescj di ce tratino cuant che a fevelin di sostignibilitât?!?
Fra i aspiets calcolâts par dâ il certificât a son ancje ambient e biodiversitât, ma al è stât dimostrât che ce che si è fat e che si fâs a Sauris al sarà stât fat pal turisim ma no sigûr pe sostignibilitât. Par fâ capî ancjemò miôr la cuistion: se si à a cûr la sostignibilitât, si fâs in mût che la progjetazion di une opare e tegni cont di ce impat che e à sul ambient e su lis speciis presintis e si fâs in mût di minimizâ lis consecuencis o, se dal câs, une opare no si fâs. Se, pardabon, si vês cûr pe vite di chei altris, dilunc lis stradis (massime tal toc che al cor dongje dal lâc e che al monte sù viers Sauris Disot) a saressin cartei di pericul di traviersament di, clamìnle “piçule faune salvadie” (chei cul crot par intindisi), par che ducj i turiscj (no i saurans che, o ai vût mût di verificâlu, in grande part a son sensibii al probleme) che no cognossin il probleme a menin i lôr mieçs cun prudence, evitant di spriçâ i anfibis (massime lis ‘savis Bufo bufo) e di fâ i maçalizis che si podin viodi sù par chê strade.
◆ Alore ce che si sosten cul certificât – che al è dât fûr midiant di une valutazion “credibile, imparziâl e rigorose” – ce robe ise? O vin bielzà viodût che mistificâ il significât des peraulis (che si viodi su “La Patrie” di Mai e Jugn dal 2022) al è une strategjie doprade par confondi e fâ crodi che ce che al ven fat al sedi “just” e rispietôs dal ambient. Al è stât ripuartât sul imprin che Sauris al è stât definît “brâf e biel”, ma la bravure e la bielece no jentrin nuie cun la sostignibilitât.
◆ Che si tegni cont ancje che chê altre “destinazion” turistiche che e à ricevût la certificazion in Friûl-VJ e je Tarvis, là che a àn cimentât buine part dal bas dal cjanâl, là che si fasin manifestazions di masse adiriture intun sît Natura 2000 (che si viodi “La Patrie” di Jugn dal 2022 e Dicembar dal 2025) e v.i. In ducj doi i câs si è in presince di fonts publics dâts fûr par fâ ce che al è stât descrit e par otignî une certificazion che, ancje chê, e judarà a vê altris bêçs midiant de preference acuardade tal câs di bants publics. Chest al favorirà altris oparis che, in non de “sostignibilitât”, a laran a incidi su ambient e vivents, convincint ancje lis personis a fâ turisim intune “destinazion” certificade pe “sostignibilitât”. Al è clâr però che se i nestris bêçs a son doprâts par continuâ a fâ dut chest, plui che di sostignibilitât si trate dome di business.
In conclusion, si scuen tignî iniments che nol è plui pussibil continuâ a doprâ i bêçs di ducj pal interès di cualchidun e par incidi a fuart su ambient e vivents, cjapât dentri l’om. Stant che lis competencis par minimizâ i impats e la pussibilitât di fâ une altre tipologjie di turisim a esistin, al è il câs di cambiâ e doprâ la cognossince tant che vie mestre, e no il gradiment di cualchidun. ❚
