Furlans (us) fasin la Fieste!!!

Finalmentri! E jere ore! No si podeve plui! Ducj chei bêçs par nancje trê milions di nostalgjics spierdûts, cualchidun, jenfri une lande desolade da la Mitteleurope e, la plui part, sparniçâts ator pal mont.
I voleve un pugn di politics triestins e pordenonês (a Gurize a tasin) par dî che il finanziament par cheste anacronistiche Fieste da la Patrie dal Friûl, a son bêçs butâts vie; che lis prioritâts a son altris, che no plâs a ducj e che e provoche fastidi in chei che furlans no si sintin.
Dut vêr. La Fieste, in efiets, e da fastidi a une part dal mont politic regjonâl, ma chest malstâ al da displasê a ducj i furlans che, pur di no creâ barufis, a stan pensant di spostâ la lôr amade Fieste a Benicàssim, fra Barcelone e Valencie, in Spagne, là che za cualchi an fa al è stat puartât, cun grant sucès, il Festival Rototom Sunsplash. Chest an, ormai la Fieste si è fate, e Cividât, chel Forum Julii cussì evocatîf, al è stât il so centri. Ma za, par fortune, in gracie des riformis prometudis dal Guvier,  si stan metin i fiers in aghe pai prossims cambiaments radicâi: ad esempli, ta chest 2015, Aria di Festa, la Grande kermesse dal pressut, si clamarà Aria di Friuli Venezia Giulia, tant par scomençâ. Si sta pensant di slargjâsi viers il Venit e proponi la idee dal Carnevale di Venezia… Giulia! Ma il  coupe de Theatre, la magjie, il cunin che a àn tirât fûr dal cjapiel i politics che o vin dit prime, al rivuarde il progjet di imbastî une vere Fieste clamade il Giorno della Venezia Giulia. Cumò, si varà di capî cuale che e sarà la zornade presielte, considerât che il 3 di Avrîl al è za ocupât e che in Italie ogni zornade e je buine par ricuardâ alc.
A fevelin dai finanziaments: parcè butâ vie 20.000 euros (chest an, i prossims a saran di plui) cuant che o sin circondâts di problemis che a àn bisugne di sostegn economic; pensìn al Teatri Verdi di Triest (ai siei dipendents), che, siben finanziât regolarmentri ogni an, si è ricjatât plen di debits! Alore jo mi domandi, no i staressino ben chei 20.000 euros di zontâ ai 14 milions che za a àn cjapât, par cirî di risolvi la cuistion, almancul par cualchi an, fin cuant che no si torne a ripresentâ il probleme? Jo o dîs di sì! Come che i dîs di si, a la sielte de Aministrazion Regjonâl di taiâ di brut al  Font Montagne o smiezâ il finanziament pal insegnament da la lenghe furlane. In font, no coventaran miche 20.000 euros par fâ une fieste che dai 27 di Març ai 29 di Avrîl, e presente cunvignis, incuntris, spetacui teatrâi e musicâi, presentazions di libris, proiezions, mostris e v.i. sedi a Cividât che in diviers paîs dal Friul. Par fâ une fieste cussì a bastin e a coventin i Furlans. ❚
Claudio Moretti