Sfuei Mensîl Furlan Indipendent
Archivi de Patrie

Furlans pal mont, la associazion che o volaressin

............

Avost al torne puntuâl cu lis riunions e lis celebrazions dal mont dal associazionis dai furlans che tes gjenerazions passadis, ma ancje di resint, a son stâts e a tornin a jessi “libars di scugnî lâ”.
La retoriche e il folclôr a son simpri in vuaite, ancje se forsit par vie dai clârs di lune di vuê, chest an si àn sintûts di mancul. Ma no volìn fâ riferiments a nissune des 4 associazions di emigrants furlans che a son in regjon. Cussì par no scugnî rispuindi a protestis, letaris e marums che za in passâts a son stâts par vie di considerazions sui programs (mai su lis personis, ancje se cussì a son stadis cjapadis plui di une volte) o scrivìn cheste letare di compliments al President che nol esist (inmò no): chel de associazion che o bramaressin.

***
Cjâr President dai Furlans pal Mont, prin di dut i vin agrât pe sielte di batiâ par furlan la cjase di ducj chei furlans che a àn lassade la nestre Patrie. O sin contents che tal so salût di insediament al vedi doprât dome chest sostantîf bandonant la brute abitudine di clamâ il Friûl “Piccola Patria”: finalmentri o vin butade in bande cheste retoriche nazionaliste a talian vie, nus à jemplât il cûr chel so “o sin Furlans: ni grancj ni piçui” fevelant dome par furlan.
Finalmentri o cjapìn at che la finalitât prime de gnove associazion e sarà puartâ ator pai cinc continents il spirt identitari furlan, doprant la lenghe furlane tant che lenghe francje di dutis lis comunitâts furlanis che a son rivadis, di cualchi bande, a la tierce o cuarte gjenerazion. E je sêt di Friûl ator pes gnovis sezions: tocje passile plui che no chê dal vin. “Il business al pues ancje lâ ben, ma no podìn deventâ agjenziis di cumierç dismenteant lis nestris origjins” al à vût dit: no podìn che jessi dacuardi cun lui cuant che al à ancje zontât: “Baste cjalâsi ator par vê i insegnaments che ti coventin te vite. Une plante cence la lidrîs e cence la tiere par supâ ce che i covente par vivi, si secje e e mûr. Une plante cuntune lidrîs debile, al prin soflâ di burlaç e cole, si secje e e mûr. Dome chê plante che e à lidrîs profondis, e rive no dome a butâ e a tignî bot ai burlaçs, ma ancje e slargje simpri di plui i siei ramaçs, dant fueis e pomis. Chei ramaçs, chês fueis e chês pomis che a àn lidrîs in Friûl e che a supin chê linfe che o podìn clamâ lenghe furlane, o sês ducj voaltris, o sin ducj noaltris, Furlans pal Mont”. ❚ ✒ Christian Romanini

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +