FURLANS, DIGJITAIT FURLAN – E-MARILENGHE. Cronichis talianslovenfurlanis a soreli jevât

La Provincie di Gurize, in bande dal so sît istituzionâl e de pagjine su Facebook, ae direzion www.cronacheisontine.it e à metûr in pîts di un pâr di mês in ca un gnûf imprest di informazion e comunicazion pe publiche aministrazion. Il svant di chest sît al è che lis gnovis e i messaçs a son in trê lenghis: talian, furlan e sloven.
Dut al nâs in graziis di finanziaments di bande de Regjon F-VJ e cu la colaborazion di trê organizazions sei di bande slovene che furlane: la Slovenska kulturno-gospodarska zveza (Union Culturâl Economiche Slovene), il Svet slovenskih organizacij (Confederazion des Organizazions Slovenis) e la Societât Filologjiche Furlane.
Pecjât par chel non che proprit no nus plâs: Cronache Isontine / Cronachis Lisuntinis / Posoška Kronika. Chest “Isontino” al pice tes orelis. No vin ancjemò vonde di mudazions gjenetichis di nons di lûc, di ca e di là dal Lusinç?
Par chel che al inten il contignût, al è spartît in plui sezions: croniche, politiche, ambient, culture, sport, societât e altris events. Stant che la part gruesse des gnovis e je inseride di bande dai trê sogjets di culì parsore si cjatin posts soredut di caratâr culturâl, linguistic o dal associazionisim.
Il risultât al è un blog che si lasse sgarfâ in maniere facil e che, dilà de funzion di servizi che i à dât vite, al jude a meti in evidence la ricjece des diviersitâts e des comunancis de int tal Friûl orientâl di sovranitât taliane, vint che sô forme multilengâl che e je par sigûr di laudâ.
Michele Calligaris