FRIÛL EUROPE. Puigdemont president: pe Catalogne un “Bon Principi”

La Europe dal 2016 i somee masse a chê dal 2015: clopadice e involuçade tes sôs contradizions. A Bruxelles e a Strasburc a van indenant a sunâ simpri chê stesse cjançon, che e dipent simpri di plui di chês che a sunin a Berlin, a Parîs, a Rome e ta chês altris capitâls, là che une dì sì e une dì ancje si alternin declarazions di europeisim di façade e afermazions de impuartance dal «interès nazionâl». Un esempli al è stât il confront tra il president de Comission Jean-Claude Juncher e il premier talian Matteo Renzi vie pes primis setemanis di Zenâr, funzionâl soredut ae propagande politiche a nivel statâl.
compagn che tal 2015, lis cuistions di frontâ a restin chê de economie, chê des relazions tra la Europe e il rest dal mont e massime chê dai dispatriâts e dai migrants. Dopo dai atentats di Parîs dai 13 di Novembar, dopo di ce che al è sucedût l’ultin dal an a Colonie e soredut daûr de maniere distuarte che chei fats a son stâts contâts de plui part dai mieçs di comunicazion, la atenzion e je pontade soredut su chest cantin, massime tes sôs declinazions che a tocjin i confins e la sigurece. Rêts, mûrs, fîl spinât e controi di frontiere, ancje dentri de Union europeane, a son la rapresentazion plui clare che al è alc che nol va.
tra la fin dal 2015 e il principi dal an gnûf al è sucedût ancje alc di bon, che al da un tic di sperance pal avignî: chel de Europe – di une Europe divierse – e salacor ancje chel dal Friûl. Tal mês di Dicembar, ai 17, in Corsiche si à inviât il gnûf guvier regjonâl de coalizion nazionalitarie Pè a Corsica (cemût che al conte Carli Pup a pagjine 3) e ai 20 lis elezions politichis tal Stât spagnûl a àn metût fin al bipartitisim che si veve formât dopo de colade dal franchisim, cul bon risultât di Podemos, che si à zovât ancje dal fat che in diviersis comunitâts autonomis si à presentât tant che sogjet di riferiment par une part dal vôt nazionalitari: par esempli tal Paîs Valenzian cu la coalizion Podem-Compromís, in Galizie cun En Marea e in Catalogne cun En Comú Podem. Cun di plui, tes gnovis Cortes di Madrid a son ancje 25 rapresentants dai partîts espression di nazionalitâts minorizadis: doi di EH Bildu, sîs dal Partît Nazionalist Basc, vot di Democràcia i Llibertat  e nûf di Esquerra Republicana de Catalunya.
par cumò, impen, la gnove plui interessante dal 2016 e rive propit de Catalogne, là che juste te ultime dì pussibile – in câs contrari a saressin stadis gnovis elezions autonomichis – lis dôs coalizions indipendentistis, ven a dî il rassemblement Junts pel Sì (JpS) e la çampe alternative de Cup, a àn cjatât l’acuardi che al coventave par meti impins un guvier regjonâl che al à chê di puartâ indenant il procès indipendentist: di une bande la Cup i à fat fâ un pas indaûr al conservadôr catalanist Artur Mas, che al voleve jessi a ducj i coscj president, e di chê altre JpS e à la garanzie, concuardade, de poie di doi dai nazionalitaris anticapitaliscj. Il risultât al è che, intant che la stampe spagnoliste – e ancjemò di plui chê taliane – e jere daûr a cjantâ il de profundis dal indipendentisim catalan, menant ator «la intransigjence» de Cup e «l’egocentrisim» di Mas, al è rivât l’esecutîf dal president Carles Puigdemont, che tes sôs declarazions programatichis al met dongje indipendence e politichis sociâls. ❚
Marco Stolfo