FRIÛL EUROPE. Percors europeans pai students

Un element di fuarce pal disvilup in tiermins culturâi, civics e socioeconomics de Europe al è par sigûr chel des politichis pai zovins e pe istruzion. Di passe vincj agns – di cuant che tal 1989 e tal 1987 a son stâts inviâts il prin programe Zoventût pe Europe, a pro de realizazion di ativitâts di scambi interculturâl tra zovins dai 12 Paîs che in chê volte a fasevin part de CEE, e il prin Erasmus, dedicât ae mobilitât dai students universitaris dentri de Comunitât –  a son stadis tiradis sù gjenerazions interiis di feminis e oms che a àn cognossût e a àn vivût la Europe.
Cul passâ dai agns si son zontadis altris azions, fintremai ae programazion atuâl (2007-2013) cuntun stanziament di 13 miliarts di euros. Cumò dut ce che al tocje istruzion e formazion al è cjapât dentri dal program Long Life Learning pal aprendiment permanent, che si presente tant che un insiemi di programs setoriâi (Comenius, Erasmus, Leonardo, Marie Curie e Grundtvig, che al è specific pal aprendiment pai adults), adun cuntun program trasversâl e cul program Jean Monnet, che al sosten l’insegnament, la ricercje e il studi di argoments che a àn a ce viodi cu la integrazion europeane. In chest cjamp e va indenant ancje la azion a pro de armonizazion dai percors formatîfs, dal ricognossiment dai titui di studi, dal rinfuarciment dai rapuarts tra formazion e lavôr e de valorizazion de ricercje, inte suaze dal “spazi european de istruzion superiôr” previodût di chel che lu clamin “procès di Bologne”. Mobilitât dai zovins, aprendiment no formâl, dialic interculturâl e partecipazion a son lis dimensions di fonde di chel che cumò si clame Zoventût in Azion, program indreçât ai zovins dai 13 ai 30 agns, che al va daûr de Strategjie de UE pai zovins fate buine dal Consei european tal 2009, che i siei obietîfs gjenerâi a son la creazion, dentri dal 2018, di plui oportunitâts paritariis pai zovins tal setôr de istruzion e tal marcjât dal lavôr e la promozion de citadinance ative, de inclusion sociâl e de solidarietât dai zovins. ■
MARCO STOLFO