FRIÛL EUROPE. Lenghis e dirits, si môf la Europe e si movisi in Europe

In Europe al è alc che si môf a pro de promozion dai dirits linguistics e de diversitât culturâl. Ai 18 di Jugn la Comission Culture dal Parlament European (PE) e à fat bon un document che al domande che a vegnin sapontâts l’insegnament, l’aprendiment e l’ûs des lenghis minoritariis. Al è il stampon di risoluzion su lis lenghis menaçadis e la diversitât linguistiche te Union Europeane, prontât de bande dal eurodeputât cors François Alfonsi. Il test al è jessût de Comission dopo de aprovazion di diviers emedaments. Tra chescj al è chel fat indenant di Izaskun Bilbao dal Partît nazionalist basc (EAJ-PNV) e di Ramon Tremosa di Convergéncia i Unió (CiU) in cont des politichis linguistichis di imersion a pro des lenghis mancul dopradis. La indicazion pai Stâts membris de UE e je chê di meti in vore une azion che ur permeti ai fruts di imparâ pardabon la lenghe propie a tacâ de scuele materne. La relazion e varà di jessi votade dal PE in assemblee plenarie tal mês di Setembar. Dal test a saltin fûr, tra lis altris, il ricognossiment dal plurilinguisim tant che un patrimoni par dute la Europe e la domande ae Comission Europeane di meti adun misuris legjislativis di pueste e previodi la viertidure di une linie di finanziament a pro des lenghis menaçadis pai agns 2014-2020.
Chê stesse domande di struments di tutele e di risorsis economichis specifichis e ven fate indenant di associazions e moviments. In ocasion dal so congrès, che si à davuelt dai 19 ai 23 di Jugn a Brixen/Persenon tal Tirôl dal Sud, la Union federaliste des nazionalitâts de Europe (FUEN) e à frontât propit chescj argoments: a son stadis fatis indenant la iniziative legjislative dai citadins de UE denant de Comission e la campagne di promozion e informazion «You are not alone», in cont di chel procès legjislatîf european.
Alc al ven fat ancje a nivel statâl, cemût che e mostre la aprovazion de bande des dôs cjamaris dal Parlament francês de gnove leç su la scuele, là che pe prime volte si ricognòs la esisetence des cussì clamadis lenghis regjonâls e si previôt il lôr insegnament e il lôr ûs intal orari curicolâr.
✒ Marco Stolfo