FRIÛL EUROPE. La Europe che e je e chê che e mancje: l’inovâl dal ‘Projet Spinelli’ e la atualitât

E covente une Europe divierse: plui solidarie, plui juste, plui sane, plui democratiche e pardabon «unide inte diversitât». Al vignarès di dî: plui Europe.
No son dome l’antieuropeisim sglonf di nazionalisim, populisim e demagogjie e un ciert europeisim di façade, minimalist, economicistic e intergovernatîf, ma si fâs indenant ancje alc altri: une vision alternative, in cont de partecipazion politiche, dai dirits sociâi e civîi, dal disvilup economic e de gjestion dal teritori. E je chê che e salte fûr des primis iniziativis pes elezions europeanis promovudis a nivel continentâl dai Verts, de bande de çampe alternative, cu la candidature pe Comission dal leader di Syriza, Alexis Tsipras, e de Aliance Libare Europeane, che tal so incuintri di Sant Jacum di Galizie dai 13 ai 15 di Fevrâr, e à tornât a bati su autodeterminazion, dirits linguistics, sussidiarietât, sostignibilitât, trasparence e partecipazion.
Un sburt a cjapâ sù posizions di chê fate, a pet de crisi dai ultins agns, al rive ancje dal trentesim inovâl de aprovazion dal ‘Progjet di Tratât che al istituìs la Union europeane. Ai 14 di Fevrâr dal 1984, cul vôt a pro di chel document prontât di Altiero Spinelli e dal grup dal Crocodîl, la aule di Strasburc, che tal 1981 e tal 1983 e veve fatis buinis ancje lis dôs risulzions Arfè a pro de tutele des minorancis, e faseve indenant une propueste articolade di riforme e di riorganizazion dal asset istituzionâl des Comunitâts europeanis di in chê volte. L’intindiment al jere chel di definî a clâr la distribuzion di competencis tra i Stâts membris e il nivel comunitari su la fonde di principis e indreçaments tant che chel dal primât dal dirit di chê che in chê ocasion e vignive clamade pe prime volte Union, chel de sussidiarietât, cu lis decisions di cjapâ sù al nivel istituzionâl plui dongje dai citadins, e chel de partecipazion ative e democratiche, in graciis di un potenziament des funzions dal Parlament european.
Chê propueste di riforme profonde des istituzions comunitariis e jere une vore inovative e salacor rivoluzionarie. Propit par chest, dome pôcs dai siei contignûts a àn rivât adore – e dome in timps plui resints – a jentrâ dentri dai tratâts europeans. E la lôr mancjance si le sint a fuart soredut cumò. ❚
✒ Marco Stolfo