Sfuei Mensîl Furlan Indipendent
Archivi de Patrie

I cuarante agns de “Cjarte di Strasburc” e la gnove grande manifestazion a pro de uficialitât de lenghe asturiane

Marco Stolfo
Il Parlament european

Ai 16 di Otubar dal 1981 il Parlament European (PE) al faseve buine la Risoluzion suntune Cjarte des lenghis e des culturis regjonâls e suntune Cjarte dai dirits des minorancis etnichis. Pe prime volte un orghin di chê che in chê volte e jere la Comunitât Economiche Europeane (CEE) al marcave la impuartance politiche de diversitât culturâl, dai dirits linguistics e de tutele des minorancis dentri dal procès di integrazion continentâl. Chê risoluzion si insuaze intal contest storic, politic e istituzionâl de fin dai agns Setante e dal imprin dal deceni seguitîf dal secul stât, jenfri lis rivendicazions di identitât, di dirits e di autoguvier di chel che lu clamavin “revival etnic” e il svolt impuartanton a nivel comunitari marcât des primis elezions europeanis dal 1979. I contignûts di chê cjolte di posizion dal PE – principis, indreçaments e indicazions operativis in cont dai ûs publics des lenghis minorizadis, dal lôr ûs e insegnament intal cjamp de istruzion e de formazion e dal lôr ûs e de lôr presince intai media – le rindin ancjemò in dì di vuê di grande atualitât. Cun di plui, cundut che no veve nissune fuarce di leç, chê iniziative dal PE e à sburtât sedi lis istituzions europeanis chê i stâts e lis autoritâts teritoriâls a movisi in chê direzion, tra normative e azions politichis.
◆ Cuarante agns dopo di chê risoluzion si pues provâ a fâ un belanç di chel che al è stât il so impat, diret e indiret. Di une bande, adun cu la seconde risoluzion fate buine mancul di doi agns plui tart, simpri cul socialist Gaetano Arfè tant che relatôr, par almancul vincj agns la CEE e po la Union Europeane (UE) a àn dât un jutori finanziari diret pe realizazion di cetantis iniziativis di promozion des lenghis minorizadis, a nivel locâl e inte suaze di rêt continentâl. Di chê altre bande, dilunc vie dal timp, tra leçs statâls e regjonâls di tutele, organisims di politiche linguistiche, convenzions internazionâls tant che la Cjarte europeane des lenghis regjonâls o minoritariis o la Convenzion cuadri pe protezion des minorancis nazionâls dal Consei de Europe e normis specifichis tant che chês che si cjatin tai articui 21 e 22 de Cjarte dai dirits fondamentâi de UE, la situazion e je lade in miôr, almancul in tiermins formâi.
◆ Cundut achel, pe metude in vore concrete di chei principis, pe realizazion di chês previsions normativis e pal gjoldiment efetîf di chei dirits al è ancjemò une vore ce fâ, cemût che si pues viodi, ancje cuntune cierte maluserie, propit intal Stât talian e inte Regjon che e ten dongje la plui part dal Friûl cu la zone di Triest. In chest sens chê che e ven clamade ancje “la Cjarte di Strasburc dal 1981” e reste un pont di riferiment pes rivendicazions e pes bataiis di fâ indenant.
◆ Cun chest ategjament, si pues intivâ un leam concret jenfri la “prime Risoluzion Arfè” dal 1981 e ce che al è sucedût a Uviéu/Oviedo tes Asturiis juste ai 16 di Otubar stât, cuant che in passe 30 mil di lôr a an fat une grande manifestazion a pro dal ricognossiment dal status di uficialitât de lenghe asturiane, che par cumò inte Comunitât autonome des Asturiis, dentri dal Stât spagnûl, e je destinatarie dome di cualchi azion politiche di valorizazion: masse pôc par garantî pardabon dirits di fonde e par meti in vore politichis linguistichis di sest.
◆ Associazions e entitât asturianis a fasin indenant chestis rivendicazions za di cetant timp. Cumò la cuistion e je jentrade ad implen intal procès di riforme dal statût di autonomie, là che e varès di cjatâ spazi propit la “oficialidá” dal “asturianu”. ❚

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +