FRIÛL EUROPE. Euroregjon: “senza confini” ma cun cualchi pont di domande

La cooperazion teritoriâl e je une des stradis plui batudis par fâ sù la unitât de Europe. Meti dongje teritoris, economiis, culturis, popolazions par disvilupâ relazions e progjets, scjavaçâ confins e creâ colaborazions strentis e in plui setôrs, magari tra ex nemîs, par cumò al è ce che al somee di plui ae costruzion de Europe unide, fondade su pâs, disvilup, democrazie e dirits.
Cul passâ dal timp iniziativis di cheste fate a àn cjapât sù in maniere cressinte un implant istituzionâl. In cheste suaze a saltin fûr lis Euroregjons, sogjets che soredut tai ultins dîs agns a son calcolâts tant che chei plui adats par «promovi la cooperazion fra regjons frontalieris o altris entitâts locâls e autoritâts regjonâls», cemût che lis definive une Decision dal Parlament european dal 2005.
Chi di nô, cuant che si fevele di “Euroregjon”, si fâs riferiment prin di dut ae cooperazion teritoriâl tra il Friûl-VJ, la Carinzie, la Slovenie e in prospetive lis conteis di nordovest de Cravuazie. La idee di fonde e je chê dal adeguament de vecje Alpe-Adria ae situazion dal dì di vuê, cuntune struture di pueste par meti in vore inte maniere miôr progjets e iniziativis. La teorie e je deventade realtât, daûr des previsions dal Regolament CE n. 1082/2006, che al dissipline la istituzion, la struture e il funzionament dai Grups europeans di cooperazion teritoriâl (GECT).
Propit un GECT al è chel che al è stât metût adun de nestre Regjon, dal Venit e de Carintie. Il pas decisîf al è stât fat ai 27 di Novembar, cu la firme a Vignesie di statût e convenzion e  in curt e varès di indotâsi ancje dai siei orghis eletîfs e des sôs regulis di funzionament par disvilupâ la cooperazion in diviers setôrs, a tacâ dai traspuarts, de energjie, de santitât e de culture.
La Euroregjon si clame “Senza Confini” – ma no podevino dâi un non miôr? – e cemût che si viôt e je ancje “cence Slovenie”. Di cheste mancjance e des declarazions fatis dai nestris sorestants in cont des sôs dimensions gjeografichis a divegnin diviersis domandis, a tacâ di chês sul rûl dal Friûl. Par cumò la presidence le à il Venit, la direzion la Carintie e la capitâl e je a Triest.
✒ Marco Stolfo