Sfuei Mensîl Furlan Indipendent
Archivi de Patrie

SIUMS DI STORIE – come che e varès podût lâ. 420: une acuile di aur in cjamp ros

............

La rubriche storiche e continue ma cuntune variazion: cemût saressie stade la storie dal Friûl se no fos lade come che invezit e je lade te realtât? Noaltris o provìn a rispuindi cussì…
***
Cemût che e je lade
Come che si sa, la Patrie dal Friûl e à simpri fat gole ai siei nemîs. Espression par secui dal podê Imperiâl fin de ete dai Otons di Sassonie, e probabilmentri ancje prime, uficialmentri inschiriade cun Indrì IV inte lote pes invistiduris, duncje in clâf antiromane (fat che i à permetût a Siart di vuadagnâsi il titul di Princip), e à cognossût la sô magnificence propit parcè che proietade plui tal cûr da la Europe che intune dimension pensinulâr. I plui grancj patriarcjis a vignivin fûr dal so cûr, sigurementri no de Italie: Popon di Treffen, Bertrand di Saint Genès, Marquart di Randeck, dome par nomenâ cualchi figure plui cognossude di chês altris. Par chest motîf, par secui a son stâts organizâts riviei, sassinaments e atentâts cuintri il lôr tron de bande di une nobiltât che e sperave, cun Vignesie, di disberdeâsi dai sorestants todescs e di cjapâ sù il control di une tiere strategjichementri plantade jenfri il Nord e il Sud, l’Orient e l’Ocident dal mont Medievâl. Udin al è deventât la cjase dai amîs de Dominante, Cividât la fuartece dai fedêi imperiâi. Tal 1411, l’esercit dal imperadôr al concuistave Udin, e tal domo di Cividât al vignive invezit il patriarcje Ludovì di Teck. Vignesie no varès mai podût permetisi di pierdi la ocasion di poiâ lis grifis suntun contest tant favorevul, e cussì e tache une vuere lungje e odeose cuintri Imperiâi e Patriarcjins, cence sparagnâ lis popolazions dai paîs e des campagnis, cun incursions sanganaris progjetadis par fâju colâ te fam e te disperazion.  Ai 13 di Lui dal 1419 Cividât al cole; ai 7 di Jugn dal 1420 Udin al cjapitule, decimât di une resistence eroiche de popolazion ma disfat sedi de strache che dal tradiment de famee Savorgnane, simpri pronte a servî Vignesie pûr di vê cualchi contentin dai gnûfs parons. Tristan Savorgnan, propit chel che al veve copât tal 1394 il patriarcje Zuan Sobieslaw di Moravie, nuie di mancul che il nevôt dal Imperadôr Carli IV, al jentre vitoriôs in Citât cu la bandiere dal Leon, mentri che la Acuile e ven butade sul fûc. Nobiltât e popul di Glemone, Sant Denêl, Vencon, Tumieç e Monfalcon a proclamin la rese une daûr chê altre e il Friûl al devente venezian, pierdint chel rûl di stât indipendent european che al gjoldeve fin dal 1077. E che nol varès mai plui cognossût inte storie dopo chê ete. Une prospetive, un sium che nus fâs scombati ancjemò in dì di vuê.
***
Cemût che e podeve lâ
Ai 6 di Jugn dal 1420 e rive al Cjapitani di Udin la gnove che trê dîs prime ancje Albone e Fianone, in Istrie, si jerin rindudis a Vignesie. Dal principi dal an, il stes destin al jere tocjât a Feltre, Belum, Siest, Puart, Sant Vît, Strassolt, Prampar, Voleson, Spilimberc, Manià… La citât e je sierade dal esercit di Sant Marc di tant timp. Il risultât e je la fam, la sêt, la pôre di epidemiis, la sigurece dai svindics che la Dominante e varès di sigûr fats une volte jentrade, lassant che i siei soldâts se cjapassin cu la int, come che al jere za sucedût in miârs di altris paîs, massime a Prampar e a Glemone. In plui, l’esercit dal Patriarcje Ludovì di Teck al jere partît pes Gjermaniis tal Zenâr di chel stes an, e mai plui tornât: cussì si decît di mandâ une delegazion di udinês fin al senât di Vignesie, par declarâ la rese e preâ di no cjapâse cu la Citât. Ai 7 di Jugn si vierzin i puartons. Tristan e Francesc Savorgnan, fradis e compliçs, a spietin sul lôr cjaval. Braurôs, a gjoldin sodisfats, parcè che in curt a saran lôr i siôrs di Udin, dal Friûl, de Patrie. A son agns che a masanin il lôr odi cuintri il Patriarcjât. A tramin, a preparin surtidis, imboscadis, sassinaments paiâts cul aur zechin de Serenissime, che – al è clâr – ur à imprometût dut ce che a vuelin, ce che a sperin e che a desiderin. A stan par zigâ l’ordin di jentrâ cuant che in lontanance si sint un sun di trombe, compagnât dal rumôr di mil tambûrs di vuere. Vie pe plane un grant fumaron, e berladis e sclopetadis e fûcs. Al somee che un trop grandonon di int al stedi corint in direzion de Puarte di Udin. I doi fradis si cjalin te muse, stranîts, un pôc spaventâts. Cui sono, ce vuelino? Cui ise dute chê int che e cor e che e berle? Tra i prins confenons che si rivin a viodi al è chel di Sant Denêl, e dongje chel di Glemone e di Vencon e di Tumieç, cuntune sdrume di cjargnei e di cjadovrins, masnadis armadis di roncons, ristiei e forcjis. Nicolau di Prate e Cristoful de’ Valentinis a cjaval cui lôr vassai e int di Monfalcon, e di Maran. E in bande un slusignâ di armaduris. Un esercit grandissim, che no si viôt dulà che al finìs ni di dulà che al rive: sot lis insegnis dal Patriarcje Ludovì di Teck, miârs di ongjarês e di cravuats. Il cont Erman di Cilli, cui siei Slovens. E dute la cavalarie pesante dal imperadôr Sigjismont. E je la vôs di une Europe che si ricognòs tal Patriarcjât e che e à decidût di no lassâlu murî. Tristan nol sa ce fâ, e coragjôs come che al è, al pense ben di bati il talon su la panze dal cjaval e di scjampâ vie, e di corse, par evitâ une sconfite sigure, dal moment che so fradi Francesc al è bielzà scjampât di furie in direzion di Maran. Ma un clap tirât di une fionde dai bastions di Udin lu fâs colâ par tiere. “Chest al è in memorie di mê mari, bastart di un Savorgnan, une di chês biadis zovinis che un an fa tu âs fat taiâ a tocs di chel vuestri manigolt di Arcelli!”. E jere ben la veretât, che propite tal 1419 chel cjapitani di Vignesie, l’Arcelli, par svindic dai udinês che a vevin copât cuatri soldadats di sant Marc, al veve metût a muart trente zovins e vincj fantatis furlanis. A chel berlâ e jes fûr ancje la popolazion di Udin, furiose, cu la bandiere di vuere dal Patriarcjât: une Acuile di aur in cjamp ros. Ce che al ven dopo e je aromai storie. Ducj a san che in chê zornade gloriose Vignesie e à di rindisi, e la Patrie dal Friûl e ven confermade jenfri i siei confins storics cuntun edit emanât nuie mancul che dal imperadôr Sigjismont: un dai principâts plui grancj de Corone dal Sacri Roman Imperi di Gjermanie, insiemi cu la Sassonie, la Baviere, la Svevie, la Franconie, la Marcje dal Est (che cumò si clame Austrie), la Cravuazie, la Ongjarie, la Boemie e la Moravie, e vie disint. Lontane de culture e de storie taliane, tal 1848 il Cont di Cavour no si è nancje lontanementri impensât di progjetâ une campagne risorzimentâl par concuistâle ae Primevere dai popui talians: che sburtade si è fermade tal 1866 su la Livence, che mai e mai altri la Prussie, aleade cul Ream di Italie in chê vuere che i Talians a clamin “la Tierce di Indipendence”, e varès permetût che un dai plui impuartants principâts todescs, come la Patrie dal Friûl, al fos regalât ai talians. Otignude la indipendence ae fin de Prime Vuere Mondiâl par vie dal tratât di Parîs, tal 1919, compagn de Cecoslovachie, de Polonie e de Jugoslavie, in dì di vuê cheste Tiere e je considerade une des Republichis  plui impuartantis de Europe. Il so piçul Parlament, che al svante secui di storie e che si riunìs daûr tradizion antighe sul antîc cjistiel di Udin, al viôt une rapresentance une vore significative di popui, di lenghis e di culturis diferentis: furlans, slovens, carinzians, cravuats, istrians, che par Bruxelles a àn rapresentât, une vore prime de nassite de Union Europeane, un esempli straordenari di civîl convivence e di unitât culturâl. Un esempli par ducj chei popui, insome, che cun dignitât e braùre a aspirin ae lôr autodeterminazion.
✒ Angelo Floramo

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +