Sfuei Mensîl Furlan Indipendent
Archivi de Patrie

Dirits linguistics in Europe, a Sant Jacum di Galizie la Assemblee de ELEN e sune la svearine

Marco Stolfo
La Assemblee de ELEN

Ai 12 e ai 13 di Novembar a Sant Jacum di Galizie (Santiago de Compostela) si à davuelte la assemblee de ELEN, rêt che e ten dongje une schirie di entitâts associativis e organizazions che a son espression di diviersis comunitâts linguistichis e nazionâls minorizadis de Europe. Vie pai doi dîs dal event, inmaneât in tiermins operatîfs de A Mesa pola Normalización Lingüística, innomenade entitât organizative e rivendicative galiziane, li dal Museo do Pobo Galego, di une bande la ELEN e à rinovât lis sôs incarghis istituzionâls e di chê altre e à metût adun une schirie di intervents di personalitâts impuartantonis che a àn fat il cuadri de situazion di lenghis, dirits e tutele in gjenerâl e cun riferiment a diviersis realtâts specifichis.
◆ La assemblee e à votât pe presidence e pal comitât diretîf. Ae unanimitât la funzion di presidente e je stade dade ae galese Elin Haf Gruffydd-Jones. La professore de Universitât dal Gales, là che e je ancje diretore dal Centri di studis galês e celtics, e cjape il puest di Ferran Suay de ACPV (Acció Cultural del País Valencià), che al reste tal gnûf comitât diretîf, componût ancje di Paul Bilbao (Kontseilua), Tangi Louarn (Kevre Breizh), Marcos Maceira (A Mesa), Mirjam Vellinga (Afûk), Dòmhnall MacNèill (Comunn na Gàidhlig), Ciarán Mac Giolla Bhéin (Comhairle na Gaelscolaíochta), Pádraig Ó Tiarnaigh (CnaG), Claudia Soria (CNR), Anneli Sarhimaa (Univ. Mainz), Krisztina Sándor (EMNT), Marga Payola (Plataforma per la Llengua) e Conchúr Ó Giollagáin (Soillse, UHI).
◆ Tra i ospits che a son intervignûts a jerin Fernand de Varennes, reladôr speciâl des Nazions Unidis pes minorancis, Vesna Crnic´-Grotic´, presidente dal Comitât dai esperts che al sta daûr dai monitoraments in cont de metude in vore de Cjarte Europeane des Lenghis Regjonâls o Minoritariis (ECRML), e Ana Miranda Paz, za eurodeputade dal BNG (Bloque Nacionalista Galego) dal 2012 al 2013 e dal 2018 al 2019.
◆ De Varennes, doprant la frase di Dickens «i timps miôr, i timps piês», al à marcât la dfiference jenfri l’otimisim dai agns Otante e Novante dal secul stâts, segnâts des gnovis normativis statâls e substatâls di tutele e de iniziativis europeanis, tacant de ECRML e de Convenzion Cuadri pe Protenzion des Minorancis Nazionâls (FCPNM), e il disincjant dal dì di vuê, stiçant la ELEN e i siei components a lâ dilunc inte lôr azion di promozion e di rivendicazion. Crnic´-Grotic´ e à dât cont des gnovis in cont de Cjarte, di chê buine de firme de bande dal Portugal a chês brutis che a tocjin i discors di odi cuintri des minorancis e des lôr lenghis che si cjatin in ducj i stâts europeans e lis cundizions des lenghis teritoriâls che no son ricognosssudis in maniere uficiâl. Miranda e à fevelât de azion dal Parlament European a pro di lenghis, minorancis e dirits, des dificoltâts che a son intal contest de Union Europeane (UE) e des gnovis iniziativis che al covente inviâ dentri e fûr des istituzions.
◆ La Assemblee gjenerâl de ELEN e à cjapât posizion su diviersis cuistions. Tra i documents fats bohns a son une lamentazion di cemût che lis istituzions de UE no rivin a promovi lenghis e dirist linguistics e une domande ae Nazions Unidis di intervignî cuintri dal guvier francês e de sô azion di ridimensionament de cussì clamade leç Molac. ❚

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +