Sfuei Mensîl Furlan Indipendent
Archivi de Patrie

Sâl, salmuerie o glerein: ancje lis pistis ciclabilis a àn bisugne di manutenzion invernâl

Barbara Cinausero
Pistis ciclabilis di Invier

Par solit, cul sbassâsi des temperaduris si sbasse ancje il numar di cicliscj su lis stradis, ma il club austriac dal trafic (VCÖ) al à viodût che in medie il 50% di lôr al volarès continuâ a doprâ la biciclete, ancje se dome di cuant in cuant, ancje vie pal Invier. Cun di fat, il numar si sbasse fin al 7% intai mês di Zenâr e Fevrâr, par vie de nêf su lis pistis ciclabilis che a deventin impussibilis di doprâ.
◆ In timps di pandemie, che i mieçs publics a son cetant pericolôs di doprâ, a son simpri di plui chei che a vuelin continuâ a zirâ in biciclete e, si che duncje, lis aministrazions publichis a capissin che bisugne lâ incuintri a cheste esigjence. Alore a cjalin ce che a fasin intes citâts de Scandinavie, là che lis pistis ciclabilis a àn la stesse prioritât di manutenzion des stradis normâls e, scomençant dal 2025, a varan la precedence.
◆ Par cumò in Austrie lis pistis che si tegnin par impuartantis, par vie dal trafic de scuele e dal lavôr e pal colegament jenfri i paîs, si cjatin al cuart puest intune schirie di siet, par chel che al tocje lis manutenzions invernâls des stradis, vie che chês altris a son al cuint. Ma i timps a stan sburtant dut il setôr alpin a mudâ otiche.
◆ L’indreçament lu da il Vorarlberg, une des regjon plui montagnosis e nevosis de Austrie, là che di Dicembar a Març si spindin fin a 950 euros par km pe manutenzion des pistis ciclabilis. Cheste e ven fate cun machinis di pueste che a sparnicin une sorte di salmuerie, che cussì si dopre cetant sâl di mancul. A Innsbruck invezit si provarà doprant il sâl. Cun chestis provis si spere di podê aumentâ la utilizazion des pistis vie pal Invier, ma soredut di incressi la sigurece dai cicliscj, stant che, se si dopre glerein come che si faseve prin, si sbrisse dispès, massime se si frene, cul pericul di fâsi mâl.
◆ Par che il sâl nol vuasti lis areis verdis dal dulintor si à pensât di ridusilu al minim, doprant mieçs speciâi che lu sparnicin cun precision. Cu la Vierte si varès daspò di lavâ ben lis cjarezadis par che il dam al sedi il mancul pussibil.
◆ I berdeis no son ducj achì: a Salon, purtrop, in dute la citât no si pues butâ sâl pes stradis, fale chês là che a passin i mieçs publics. Ancje la stiernete di glerein no je masse ecologjiche, se si pense al polvar che al bute sù e ae dificoltât di gjavâlu vie inte Vierte. Dut chest al coste tantis oris di lavôr, ma ancje tancj bêçs pal smaltiment, par vie che al è un refudum speciâl.
◆ Cun di fat, la volontât di doprâ un mieç public, che al è une vore ecologjic, e i problemis che chest al tire daûr par vie de nêf di Invier a somein in contrast. Si tratarà di cirî une vie di mieç, stant che no si pues vê il caratel plen e la massarie cjoche! ❚

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +