‘Diada’ e inovâl dal referedum dal 2017, in Catalogne a saran celebrazions di lote e memorie

La zornade dai 11 di Setembar in Catalogne e je fieste nazionâl. L’inovâl de concuiste di Barcelone de bande des trupis borbonichis intal 1714 inte suaze de vuere di sucession spagnole – une sconfite storiche pai catalans –, di sù par jù un secul e mieç e je une ocasion par fâ memorie vive, palesâ braùre e identitât e fâ indenant rivendicazions di dirits e autoguvier. Vie pal timp, cun chest ategjament e cun chest intindiment, la ‘Diada Nacional de Catalunya’ e je stade ricognossude ancje in maniere uficiâl, prime de bande de Mancomunitat catalane, istituzion teritoriâl in vore dal 1914 al 1925, po de Generalitat, vie pai agns Trente dal secul stât, e po ancjemò, dopo de fin dal Franchisim, de gnove Comunitât Autonome, tacant dal 1980.
◆ Intant de ditature, la fieste e jere improibide, ancje se intune maniere o in chê altre e vignive memoreade compagn, propit cun chê di fâi cuintri a Franco e al so regjim. Chest al è sucedût massime vie pai agns Cuarante e pai agns Setante, rivant ae grande Diada memoreade ai 11 di Setembar dal 1976, la prime fieste nazionâl fate dopo de muart dal ditatôr. Tai ultins timps la zornade e à cjapât sù significâts culturâi e politics ancjemò plui impuartants, inte suaze dai gnûfs rapuarts conflituâi cul guvier di Madrid.
◆ Ancje pal 2021 la ricorence e sarà une ocasion di memorie e di lote. Lu àn marcât, ancjemò ai prins di Lui stâts, i rapresentants des organizazions de societât civîl catalane protagonistis de lote pe indipendence – la Assemblea Nacional Catalana, l’Òmnium Cultural e la Associació de Municipis per la Independència – presentant il program des iniziativis par chest an. Cundut dal rispiet des misuris di sigurece sanitarie, si tornarà a fâ la manifestazion in place, cuntun corteu che al tacarà de Plaça Urquinaona e che al rivarà li dal Parc de la Ciutadella, là che si cjate il Parlament de Catalogne. L’intindiment dai organizadôrs des manifestazions al è chel di tignî dongje lis celebrazions de Diada e chês pal inovâl dal referendum pe indipendence fat il Prin di Otubar dal 2017, dutis sot dal sproc «lluitem i guanyem la independència» (lotìn e concuistìn la indipendence), par sburtâ la societât e lis istituzions catalanis a lâ dilunc su chê strade.
◆ Tai ultins mês, intal confront jenfri Catalogne e Stât spagnûl, dopo dal inviament dal gnûf guvier autonomic, e je stade la concession de bande di Madrid dal indult par nûf dai dirigjents indipendentiscj impresonâts par vie dal referendum di cuatri agns indaûr.
◆ Il premier spagnûl Pedro Sanchez le à “vendude” tant che une grande iniziative di dialic; e je diferente la interpretazion de bande catalane. A nivel istituzionâl, il president de Comunitât Autonome, Pere Aragones, lu à calcolât tant che «un piçul pas», che par sigûr «nol è avonde» par vie che «la repression metude in vore cuintri dai citadins catalans e je une vore plui largje e profonde». Denant dai tancj procediments judiziaris che a son ancjemò impins «la uniche soluzion di sest e je la amnistie», intant che in prospetive «si varà di tornâ a votâ – cuntun gnûf referendum – in cont dal avignî politic e istituzionâl de Catalogne». Pe societât civîl, cemût che al vignarà tornât a marcâ ancje intes manifestazions pe Diada e pal inovâl dal Prin di Otubar, i indults concedûts dal sigûr no fermaran la lote dai catalans pe autodeterminazion. ❚