Sfuei Mensîl Furlan Indipendent
Archivi de Patrie

AUSTRIE. Naie obligatorie ancje pes feminis?

Barbara Cinausero

In Italie a son bielzà un pâr di decenis che si à capît che la jeve obligatorie no si pues plui fâle, stant i gnûfs ecuilibris jenfri difese e sigurece, sedi internis che a nivel mondiâl; par chest si sin indreçâts su fuarcis armadis di professioniscj. In Austrie invezit la jeve obligatorie e à simpri continuât e cumò a pensin di vierzile ancje aes feminis.
◆ Scomençant dal 1955, l’esercit austriac si poie su la jeve obligatorie maschîl intant che lis feminis a son une ecezion e par cumò a vegnin cjapadis dentri nome su base volontarie, e dut câs juste par une cariere professionâl avonde curte. La politiche no varès voie di mudâ chest fat, impen che la int, stant a un scandai dal cuotidian “Der Standard”, le pense in maniere diferente: doi tierçs dai oms, cun di fat, a son a pro di une viertidure ancje aes feminis dal oblic di jeve; lis feminis invezit a son contrariis.
◆ Dut câs, il popul austriac al à in contrari un esercit professionâl e al à miôr dâi plui fuarce a chel di jeve. Intai ultins decenis la discussion sul oblic di jeve si è simpri indreçade su la pussibilitât di un servizi alternatîf pai obietôrs di cussience, che a refudavin di doprâ lis armis, e cussì, scomençant dal 1975, si à metût sù un “servizi civîl”.
◆ Par cualchi an, fintremai dal 1991, i zovins a scugnivin passâ par un “esam di cussience”, ma po dopo chest al fo tirât vie. Di in chê volte, in Austrie cui che nol vûl rispuindi ae clamade de jeve militâr al pues sielzi di fâ il servizi civîl. Purpûr, la discussion sul oblic de coscrizion e dal servizi militâr no je mai finide. Di fat, tant ce che al diven de Costituzion, il servizi militâr obligatori si pues scjinfâ nome cuntun servizi civîl, che al è stât metût sù di pueste, e a chest ancje lis fuarcis politichis plui conservadoris a àn scugnût fâ bon acet. Intal 2013 un referendum popolâr al à fate buine la volontât di mantignî il sisteme dai doi servizis, chel militâr e chel civîl: il 57% al à mostrât la volontât di vê la jeve obligatorie, intant che nome il 43% al à votât a pro di un esercit di professioniscj. Bisugne dut câs marcâ che, leìnt ben i risultâts, e ven a flôr une fuarte diference di opinions jenfri lis fassis di etât: il consens ae jeve obligatorie al aumente cul incressi de etât, biel che inte fasse 16-29 agns si da preference a un esercit di professioniscj, e chest al vâl ancje pe plui part des feminis, a pet dal parê dai masclis.
Il scandai al veve domandis precisis su lis motivazions pro o cuintri de jeve obligatorie feminîl e des rispuestis al è vignût fûr che oms e feminis le pensin diferente su la paritât di tratament di ducj chei che a son sometûts ai dovês militârs.
◆ L’argoment plui fuart a pro – tignût sù soredut dai oms – al tocje la paritât fra oms e feminis, che in chest mût e sarès garantide inmò di plui. Le pensin diferente lis feminis, che a disin di jessi za disvantazadis in tancj puescj inte societât, e duncje a valutin di no scugnî stâ sot ancje a un gnûf oblic.
◆ Il ministri de difese Klaudia Tanner (ÖVP) no vûl comentâ i risultâts dal scandai, stant che par cumò no son in studi leçs su la jeve obligatorie feminîl, fale che continuâ su la volontarietât.  ❚

Apontaments / AVÔT DAL FRIÛL

Redazion
Furlans,a son passe 50 agns che si cjatìn a Aquilee la dì de fieste dai sants Macôr e Fortunât palAVÔT DAL FRIÛLe o cjantìn Messe te nestre lenghe, tal spirt di chê libertât che si iludevin di podê respirâ almancul in glesie scomençant a doprâ il Messâl, che al è ancjemò intune spiete penose par […] lei di plui +

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +