FRIÛL EUROPE. Cooperazion teritoriâl, un avignî di fâ sù e une storie di no tradî

Guvier dal teritori, disvilup economic, coesion sociâl, sostignibilitât, partecipazion democratiche, atenzion pal ambient e pe economie locâl, cooperazion teritoriâl. A son i argoments e i indreçaments operatîfs che si cjatin te Agjende teritoriâl europeane 2020 (AT 2020), definide ancjemò ai 19 di Mai dal 2011 a Gödöllő in Ongjarie. A pensâi parsore al è propit ce che al covente, sei ae Europe che al Friûl. Cun di plui ce che al salte fûr di chel document al corispuint a chê vision di Friûl che a àn mostrât in tancj di lôr, a pro di un “Friûl Friûl” e duncje di un “Friûl in Europe” e viert al mont.
De partecipazion, tal 1949, di une delegazion furlane ae fondazion de FUEN (la Union federaliste des nazionalitâts e des regjons de Europe) ai resonaments di Fausto Schiavi in cont dal Friûl fintremai aes liniis programatichis dal gnûf progjet politic furlan “Un Friûl Diferent”, là che si lein ancje riferiments ae “AT 2020”, propit su chescj cantins si pues vualmâ une linie di continuitât, pûr inte diversitât dai timps e des sensibilitâts.
Propit chê linie e chel ategjament a àn puartât a cjalâ in maniere positive viers dal progjet di Alpe Adria ancjemò tal 1969, nûf agns prime de sô fondazion, e a viodi di simpri tant che alc di naturâl la cooperazion, a plui nivêi, cu la Carintie e la Slovenie. Di chê stesse linie e di chel ategjament e divegnin sei la atenzion viers dai ultins agns di Alpe Adria, che la sô pierdite progressive di fuarce e di iniziative e je leade ancje ai mudaments epocâi che a àn cambiât il contest là che e jere stade metude adun, sei chê in cont de Euroregjon, che dongje des sôs tantis potenzialitâts e palese contradizions e diviers ponts di domande, cemût che o vin marcât su chestis pagjinis un mês indaûr. Cun di fat, e somee simpri di plui une sorte di “dependance” de fantomatiche “Macroregione del nord”: une ipotesi une vore taliane e une vore pôc europeane, là che la uniche robe clare, par cumò, al è il fat che e va cuintri des dibisugnis dal Friûl e de autonomie  speciâl de regjon Friûl-VJ. Tant a dî che, impen di deventâ il centri de Europe, o tornaressin a jessi la periferie de Italie.
✒ Marco Stolfo