Ancje i sostignidôrs plui infogâts di un cambi politic in Carinzie no si spietavin che i eletôrs carinzians si esprimessin cussì clarementri cuintri il partît FPK cul governadôr Dörfler a cjâf.
La ondade di scandui di coruzion politiche dulà che a son coinvolzûts diviers sucessôrs di Haider, ancje se un grum dai fats no saran mai sclarîts, e à butât jù il mît di Haider. La sconfite dal governadôr Dörfler no à paragon in dute la storie de seconde republiche: il record negatîf dal partît popolâr (-15,9% in Tirôl tal an 1989), al è stât batût dal FPK tes elezions dal Març di chest an (-28%). Se si visìn che Dörfler al veve vude la maiorance assolude tal guvier, si pues dî che il partît al è colât jù pardabon par tiere: cumò si cjatin al stes nivel dai Verts.
I grancj vincidôrs a son i socialdemocratics cun Peter Kaiser a cjâf (sore il 37%). A saran lôr che a decidaran in merit ai puescj plui alts, tant che un di lôr al sarà il gnûf vice governadôr provinciâl e il prin e il secont president de Assemblee, come ancje il president dal consei scolastic.
No mancul impuartantis a son stadis lis elezions pal parlament carinzian pe minorance slovene, anzit avonde positivis. Pe prime volte, lis cuistions che a rivuardin la tutele de minorance, il finanziament o i cartei bilengâi no son stadis sfrutadis par fâ une campagne negative cuintri i slovens. La politiche carinziane e a imparât che no si pues vuadagnâ vôts cuntune campagne indreçade cuintri la minorance.
La comunitât slovene si mostre contente che dopo cuasi 25 agns il sisteme Haider si sedi sdrumât jù, cun di plui pe prime volte te storie de seconde republiche doi deputâts slovens a àn otignût un mandât: Zalka Kuchling (Verts), vice presidente de organizazion Skupnost Koroških Slovencev in Slovenk, e Lojze Dolinar (Team Stronach). Ducj i doi a vuelin lavorâ a pro de minorance. Lis primis cuistions urgjentis a son impedî che si sierin lis scuelis slovenis plui piçulis e garantî il finanziament de scuele di musiche bilengâl slovene (Glasbena šola). Anzit, i slovens si spietin dal gnûf guvier plui fonts publics pal insegnament dal sloven tes scuelis bilengâls.
La scuele bilengâl di musiche Glasbena šola e je la istituzion educative plui impuartante pai zovin talents di ducj i doi i grups etnics. Magari cussì no, si sa benon che la scuele e je in pericul par resons finanziariis. Chest al sarès distrutîf par 650 students e par 44 insegnants di musiche. “Cu la sieradure de Glasbena šola un tesaur de educazion musicâl slovene in Carinzie si piert par simpri. A un grum di talents dispès sore la medie, ur saran dineadis lis prospetivis di un sucès internazionâl”, cussì Kuchling in campagne eletorâl.
✽✽ “Mandât parlamentâr garantît pe minorance”
Ancje se tal gnûf parlament a Clanfurt a son ancje doi deputâts de minorance slovene, il president de Liste slovene EL Vladimir Smrtnik al stime che un mandât garantît indipendent pe minorance slovene al resti necessari. Dome un mandât indipendent che nol è subordenât a nissun partît o organizazion politiche al podarès rapresentâ i interès di dute la comunitât slovene.
✽✽ Il partît eurosetic dal miliardari Stronach al à superade la prime prove
Mieç an daspò la sô fondazion, il partît dal miliardari – i bêçs pe campagne no i mancjin – al è rivât adore di jessi presint tal parlament di dôs provinciis.
Elet soredut di oms, sedi di etât sot dai 30 agns o za in pension: chei frustrâts che a incolpin i politics di coruzion. Prime a àn votât pal populist Iörg Haider, dopo pal leader de diestre Heinz-Christian Strache, cumò a àn sielzût il Team Stronach.
Tes elezions di Març, in Basse Austrie e Carinzie un su dîs al à dât il so vôt al austrocanadês miliardari che al à za passât i 80 agns di etât. Pal partît eurosetic, cence un program clâr, impastanât tal Setembar dal an passât, al à votât in Carinzie l’11,3% dai eletôrs, te Basse Austrie il 9,8%.
Daspò il sucès in chestis dôs elezions, Frank Stronach al è deventât un fatôr te politiche che si scuen cjapâ sul seri. Il gnûf partît al menace soredut la estreme diestre di Strache che dopo chestis primis elezions si cjate in crisi.
Stronach si prepare za pes elezions plui impuartantis, chês pal guvier di Viene, che a saran ae fin di Setembar.
L’imprenditôr origjinari de Stirie, nassût cul non di Franz Strohsack, al à costruît cun sucès in Canadà il grup internazionâl Magna. Tacant cun 200 dolars tal sacut, al à otignût dut chel che al voleve in Americhe. Tornât a cjase, al scuen sodisfâsi cul fat che al reste dome une opzion di proteste. Bati i grancj partîts tes prossimis elezions al pâr un sium.
✒ Janez Erat
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +