Comunitâts cence tutele, in Grecie si vîf un clime simpri une vore penç
Il confinament al è finît e almancul in Europe il Covid-19 al somee che al ledi al mancul, ma il virus dai nazionalisims dominants al è simpri plui fuart. Cun di fat, la situazion de pandemie che e à segnât la prime part dal 2020 e à sburtât un pôc in dut il continent, in maniere plui o mancul esplicite, il cult gjeneralizât de nazion «una d’arme, di lingua, d’altare…». Tra bandieris dapardut, imnis nazionâi di cjantâ in ogni dontri e confins statâi di sierâ e po di domandâ di vierzi, ma cence tignî cont des dibisugnis specifichis des comunitâts dongje dal clap, chel ategjament al à segnât in chel istès la azion des istituzions e il spirt des opinions publichis e, dongje di chê dal infet, si à palesade cuntune fuarce particolâr la pôre de diversitât linguistiche e culturâl, calcolade ancjemò tant che un pericul o un fastidi.
◆ Al è ce che si à viodût in ducj chei câs là che guviers statâi e autoritâts locâls a àn dât fûr diretivis, racomandazions e indreçaments in cont des misuris sanitariis, aministrativis, economichis e sociâls cjapadis par fâi cuintri ae pandemie dome doprant lis lenghis dominantis, dismenteant cussì che in ducj i stâts a son citadins che la lôr lenghe e je diferente e che, propit intun moment di dificoltât, al covente di une bande fâsi capî di ducj e di chê altre mostrâ a clâr che lis istituzions no àn chê di fâ fîs e fiastris.
◆ Une posizion critiche in cont di cheste tindince e jere stade cjapade, ancjemò tal mês di Avrîl, de bande dal Consei de Europe e dal Alt Comissari pes Minorancis Nazionâls de OSCE (Organizazion pe Sigurece e pe Cooperazion in Europe). Juste in chê volte, ancje la ELEN – European Language Equality Network, o ben la Rêt Europeane pe Avualance Linguistiche, une organizazion indipendente che e ten dongje une schirie di associazions e altris entitâts che a son espression di minorancis e nazionalitâts – e à sometût aes istituzions europeanis e al Consei pai Dirits dal Om des Nazions Unidis la sô denunzie cuintri di chescj compuartaments.
Cun di plui, vie par chescj mês la ELEN e à tirât dongje une schirie di dâts e di informazions plui in detai che a tocjin lis diviersis discriminazions e omissions, cjapant dentri sedi lis comunicazions di servizi leadis ae prevenzion e al contrast de difusion dal gnûf coronavirus sedi l’insegnament a distance e i programs des televisions publichis cun finalitâts didatichis.
◆ Dal prin stampon dal rapuart che e à prontât al salte fûr che situazions di cheste fate a son stadis fintremai in chês realtâts là che lis lenghis minorizadis a son ricognossudis tant che couficiâls. Par chel, nol è di dâsi di maravee des discriminazions e des tensions griviis e penzis che a son stadis là che ancje in tiermins formâi i nivei di tutele a son plui bas o fintremai inesistents.
◆ Al è esemplâr il câs de Grecie, un dai stâts de Europe là che lis minorancis a stan piês. Lu veve ricuardât, juste doi agns indaûr, cu la sô partecipazion a chê edizion di “Vicino Lontano”, la ativiste de comunitât macedone, Eugenia Natsoulidou, marcant che pes popolazions turchis, macedonis, arumenis, rom, pomak e albanesis «nol è nissun ricognossiment formâl e i stes principis di avualance e no discriminazion a vegnin doprâts dispès par creâ repression e intolerance, de scuele ai tribunâi».
◆ Juste un mês indaûr e je stade la Aleance Libare Europeane (ALE-EFA), che e ten dongje la plui part dai partîts regjonaliscj e nazionalitaris dal continent, a pandi la sô preocupazion in cont dal clime che si vîf in chê part de Europe. Lu à fat cun riferiment specific ae situazion de minorance turche (sù par jù 150 mil di lôr in Tracie) e in particolâr dai esponents de lôr espression politiche, il partît Amicizie, Avualance e Pâs (DEB – Dostluk Esitlik Baris Partisi), che tacant de sô presidente Cigdem Asafoglu a son destinataris di une vere campagne di odi, sburtade ancje dai mieçs di comunicazion grêcs. La tension e je deventade ancjemò plui alte dopo che la gnove presidente de republiche, Aikaterini Sakellaropoulou, intant de sô visite in Tracie, no à volût incuintrâ i rapresentants de comunitât turcofone. ❚