Sfuei Mensîl Furlan Indipendent
Archivi de Patrie

FRIÛL EUROPE. Catalogne, mobiltazion legjitime cuintri de arogance legâl

............

Un vôt formalmentri ilegâl e sostanzialmentri legjitim, che al palese la volontât di sù par jù doi milions e 300 mil di lôr di meti in vore pardabon il dirit di decidi in maniere pacifiche, libare e democratiche l’avignî politic de Catalogne. Al è chest, in struc, il sens de consultazion popolâr su la indipendence che si à tignude domenie ai 9 di Novembar. Par vie de sospensive dal tribunâl costituzionâl spagnûl nol è stât il referendum uficiâl pe indipendence che a volevin tancj catalans e il guvier “autonomic”, ma salacor – propit par chest – il “9/N” al cjape sù un valôr e un significât ancjemò plui fuarts. Cun di fat al è dificil fâ fente che nol sedi sucedût nuie: par chei tancj che a àn votât – plui di un tierç di chei che a vevin il dirit di fâlu e plui di chei che si vevin esprimûts in cont dal Tratât pe Costituzion europeane intal 2005 o de jentrade inte NATO intal 1986 – e soredut pes cundizions di cheste consultazion, ven a dî cence la disponibilitât des listis eletorâls uficiâls, cul lavôr di passe 40 mil volontaris e in 938 dai 947 comuns catalans.
Fintremai tal ultin il guvier spagnûl al veve fat di dut par impedî ancje cheste forme di votazion e ae fin de consultazion Madrid al à mostrât di calcolâle dome che une iniziative di “rude propagande politiche”. Il so al è stât un ategjament in chel istès di arogance e di pôre: la arogance che e dinee chê volontât di partecipazion democratiche, che si mostre inte Assemblea Nacional Catalana e tal Òmnium Cultural ancjemò prime che dentri dai partîts politics catalaniscj, e la pôre che e diven des carateristichis di cemût che si palese in concret la volontât de int.
Il scuintri tra Madrid e Barcelone al è chel tra cui che al difint la unitât dal stât spagnûl e cui che le met in discussion, in rispueste a une “escalation” inzirlose di centralisim e nazionalisim spagnolist e intun procès che al è tacât za cualchi an indaûr cun passe cinccent consultazions in cont de autodeterminazion fatis a nivel comunâl.
Chê dai 9 di Novembar e je stade une vere e proprie manifestazion civiche a pro de indipendence. Plui in detai, e je la plui grande di chês fatis fin cumò e chê che si pues cuantificâle miôr, su la fonde dal numar di ducj chei che a son jentrâts intune des 6.430 cabinis eletorâls a disposizion e daûr de valutazion dai osservadôrs internazionâi che a àn seguît la consultazion e le àn judicade regolâr.
Cussì il guvier spagnûl si cjate in difese de legalitât di cumò, intant che la rivendicazion catalane di indipendence e fâs indenant une legjitimitât costituente gnove e alternative. ❚
✒ Marco Stolfo

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +