Il marcjadut di Nadâl – par todesc Weihnachtsmarkt, te Gjermanie dal sud e Austrie ancje Christkindlmarkt e Adventmarkt – al è un marcjât di strade associât cu la celebrazion dal Nadâl dilunc lis cuatri setemanis di Avent. Chescj marcjâts a àn une tradizion lungje di secui in Gjermanie, Austrie, Sud Tirôl, e in altris regjons di lenghe todescje in France o Svuizare.
La lôr storie e va indaûr ae tarde Ete di Mieç, te part de Europe dulà che si fevelave la lenghe todescje, vâl a dî soredut sul teritori dal ex Sacri Imperi Roman, che al cjape dentri ancje lis regjons orientâls de France e de Svuizare. Al principi si tratave di un marcjât che al dave ai citadins, sul tacâ de stagjon frede, la pussibilitât di furnîsi di cjar e di chel che al coventave pes esigjencis invernâls. Infin, tal secul XIV, e je nassude la usance di vendi ancje zugatui, dolçuts e regâi pai fruts par Nadâl. In chê volte a àn scomençât ancje a vendi sacuts di coculis e di mandulis: al mancjave però il vin brulè che al è invezit deventât un simbul tai marcjaduts modernis di Nadâl.
***
La storie dal Christkindlmarkt di Viene
Il cjâf lûc austriac nol à dome il plui grant numar di cafetariis, ma al à ancje il marcjadut di Nadâl plui antîc. Za tal 1296, l´arciduche di Austrie Albrecht I ur à dât ai comerciants vienês il privileç di tignî un “marcjât di Dicembar” par garantî il furniment de popolazion vienese. Cheste e je la prime testemoneance direte che nus podarès spiegâ la origjin. Tal secul XVI chest marcjât al devente, sot il non di „Thomasmarkt“, pardabon za simbul de culture natalizie.
Il costum di celebrâ il Nadâl tant che lu cognossin vuê al fo introdusût de aristocrazie vienese tal periodi Biedermeier e al rive de Gjermanie setentrionâl. Di chê volte, ancje i austriacs a tachin a celebrâ cheste fieste, simpri sot l’arbul di Nadâl. Dopo il Congrès di Viene tal 1814, o sintìn ancje de gnove usance cui regâi di Nadâl, che pôc a pôc e à concuistât plui o mancul dut il mont.
Il Christkindlmarkt nol à mai vût un puest fis a Viene e si è mudât di sede plui di dîs voltis: dome tal 1975 a àn sielzût tant che soluzion permanente il sît denant dal Municipi. Tal 1959 a àn fat sù pe prime volte l´arbul di Nadâl che par solit al à cirche 30 metris di altece e che al è a vuê il centri dal marcjadut. L’arbul al ven regalât ogni an di une provincie austriache e za di 25 agns in ca ancje dal Sud Tirôl. Chest an, l’arbul al è un sudtirolês dal comun di Olang/Valdaora.
Tal 1986 il Christkindlmarkt al è stât ampliât e ducj i prodots che no àn nuie a cefâ cul costum di Nadâl a son stât rimovûts. Cun di plui, ancje il parc »Rathauspark« al ven decorât par evocâ plui emozions di Nadâl.
Tal cors dai secui, chi si è svilupât il plui grant marcjadut di Nadâl in Austrie: cirche 145 “Standln” cun plui che trê milions di visitadôrs – e di chei 500 mil turiscj che a rivin di dut il mont – a comprin decorazions di Nadâl, dolçuts e sculturis, e a bevin il »Punsch«, vin brulè o Jagertee.
Il Wiener Christkindlmarkt al à vierzût lis puartis ai 15 Novembar e al sarà viert ducj i dîs des 10 aes 21.30, e di vinars e di sabide fin aes 22.00, fin ai 24 di Dicembar 2014.
***
Marcjadut di Nadâl di Schönbrunn cuntun senari unic
Se cualchidun al cîr alc mancul turisim e un ambient storic e romantic, alore o podìn proponi di visitâ il marcjadut di Schönbrunn. Chi si cjate un senari pardabon unic, denant de atrazion plui visitade di Viene: il cjistiel di Schönbrunn. Tal marcjât – che al à un cirche 80 espositôrs – si davuelç un programe culturâl cun musiche spiritual, gospel e altris côrs. In gracie dal so ambient particolâr, il marcjât al à cjapât il »certificât di ecelence« di bande di Tripadvisor tal 2012. ❚
Janez Erat
Feminis furlanis fuartis / “La memorie de tiere” intai documentaris di Roberta Cortella
Erika Adami
Une vite ator pal mont par contâ cu lis imagjins il valôr des identitâts diferentis Cui siei documentaris e à fat cognossi il Friûl al public televisîf talian: storiis e memoriis de Patrie e de sô int, paisaçs unics, borcs e tradizions cence timp, sclesis di mistîrs antîcs intune tiere “in moviment”. Une tiere amade […] lei di plui +
Fondazione Friuli / Un jutori concret al mont de scuele in regjon
Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +
Gnovis / Diego Navarria al vinç il Premi internazionâl Jacum dai Zeis
Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +
Pan e salam / Scufiots e trisculis
Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +
Il corot / Cungjò Dino Del Ponte, amì de Patrie e mestri di vite
Walter Tomada
Il mont de scuele, chel de musiche e ducj i furlans che a vuelin ben aes lôr lidrîs a vain pe muart di Dino Del Ponte, amì de “Patrie” e nestri colaboradôr. Un om gjenerôs e plen di voie di testemoneâ il valôr di fâ cressi i nestris fantats cu la braùre di jessi part […] lei di plui +
Int di Cjargne / A Lauc la bioapiculture “Pure”, di non e di fat
Marta Vezzi
Luca Nodale e Orietta Gressani a son i titulârs de Aziende Agricule “Bioapicoltura Pura”. Dut al è scomençât un pôcs di agns indaûr: “il gno om – e dîs Orietta – al à tacât chest lavôr che a son cirche 12 agns. Lui al faseve il camionist e par passion si jere svicinât al mont […] lei di plui +