Sfuei Mensîl Furlan Indipendent
Archivi de Patrie

Catalogne, a vincin i indipendentiscj

Marco Stolfo

La maiorance assolude dai vôts pai partîts a pro de indipendence, la incressite dal numar totâl dai seçs di chestis fuarcis tal Parlament, la redifinizion de gjeografie politiche dal front unionist e tancj eletôrs che a àn vût miôr – o che a àn scugnût – fâ di mancul di lâ a votâ. A son chescj, in struc, i risultâts des elezions “autonomichis” in Catalogne dai 14 di Fevrâr stâts. Il vôt pal parlament “regjonâl” al à confermât la complessitât de situazion, che salacor e je stade ancje complicade de pandemie.
Al merete ricuardât che a jerin elezions anticipadis, convocadis dopo de inabilitazion e de destituzion, ae fin di Setembar dal 2020, dal president de Generalitat, Quim Torra, de bande dal Tribunal Supremo, e che la plui part dai partîts – fale i socialiscj dal PSC/PSOE –  a vevin domandât di fâlis plui indenant propit par che no fossin interferencis cu lis misuris in vore anti-Covid, ma la magjistrature ae fin e à imponût la domenie di Sant Valantin.
◆ A pet des elezions dal 2017, che a vevin vût il record di partecipazion, cuntune afluence dal 79%, in cheste ocasion si son pierdûts sù par jù un milion e mieç di vôts. Par sigûr – dongje di altris motivazions – il stât di emergjence e la pôre dal infet a àn tignût a cjase cetancj di lôr. Cundut achel, se si fâs un confront cu la afluence des elezions “autonomichis”  dai 12 di Lui in Galizie (48,97%) e inte Comunitât Autonome Basche (50,78%), il dât de Catalogne (53,54%) al è plui alt. In tiermins assolûts, cu la ecezion dai partîts che si presentavin pe prime volte o che lu fasevin pe prime volte di bessôi, nissune liste e à vuadagnât masse vôts. Il PSC-PSOE, che al pontave a stravinci, al è deventât il prin partît (cul 23%) cjapant dome 652.858 vôts, o ben dome 44mil consens in plui di chei otignûts intal 2017 cuant che si vevin fermâts al 13,88%. Cui che al à par sigûr pierdût a son i partîts “storics” de diestre spagnoliste: i “civics” Ciutadanos (C’s), che tal 2017 a jerin il prin partît cuntun milion e 200 mil vôts, a sbrissin indaûr a cuote 157 mil, e il Partido Popular (PP), za avonde debil, al è passât di sù par jù 185 mil vôts a cuote 109.067. Une part di chei vôts ju àn cjapâts in neofranchiscj di Vox (217.883) che a jentrin pe prime volte tal Parlament e a son la seconde fuarce  unioniste.
◆ Ai indipendentiscj progressiscj de Çampe Republicane (ERC) ur son lâts 603.607 vôts, passe 300 mil di mancul dal 2017, ancje se in tiermins percentuâls e di seçs la lôr fuarce no je mudade e anzit cumò a son il partît plui votât tra chei a pro de autodeterminazion. Cun di fat, i centriscj di Junts dal ex president Carles Puigdemont a àn vût 568.002 vôts (380 mil di mancul dal 2017) e une part dai lôr consens (sù par jù 77 mil) a son passâts ae liste dal PdeCat, che però no à rivât a cjapâ nancje un puest tal Parlament. La CUP (çampe anticapitaliste indipendentiste) e à plui o mancul confermât i vôts des elezions passadis (189.087), vuadagnant in percentuâl e in seçs, intant che le afiliazion catalane di Podemos (ECP) e à pierdût plui di un tierç dai vôts (di 325 mil a 195 mil), ma e à tignût bot.
◆ Daûr de distribuzion dai 135 seçs, là che la maiorance e je di 68, a son i numars par un guvier indipendentist e progressist poiât di ERC (33), Junts (32) e CUP (9) – simpri che a rivin a metisi dacuardi – che al podarès zovâsi eventualmentri ancje dai vôts di ECP (8), fuarce no indipendentiste ma a pro de amnistie pai “presos politics” e di un referendum concuardât cun Madrid. ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +