Sfuei Mensîl Furlan Indipendent
Archivi de Patrie

Brute figure de Comission Europeane, che no cjape in considerazion il Minority SafePack

Marco Stolfo

Un brut segnâl pal presint
e pal avignî de UE,
ancje se la Comission e podarès cambiâ idee plui indenant

Il Parlament European (PE) che al sburte a pro dai dirits linguistics, di tutele des minorancis e di partecipazion civiche dai citadins europeans e la Comission Europeane (CE) che e somee dal dut indiferente viers di ce che si môf in Europe che e vûl jessi Europe pardabon. Al è ce che al è sucedût jenfri la fin dal an passât e il principi dal 2021 e che in chel istès al devente motîf di sperance e di aviliment, mostrant lis dôs musis de Europe, de Union Europeane e de integrazion continentâl. Il 2020 si veve sierât pardabon cuntune gnove interessante, intant che l’an gnûf al è tacât cuntune gnove par nuie buine, no dome par ce che al tocje la tutele des minorancis, i dirits linguistics e il pluralisim culturâl, ma fintremai la citadinance ative, l’ativisim europeist e l’avignî de UE.
◆ La buine gnove, che e veve sierât cuntun rai di soreli une anade che par plui motîfs ducj cuancj no viodevin la ore che e finìs, e je chê de discussion e de aprovazion, tra i 14 e i 16 di Dicembar stâts, de bande dal PE, cun 524 vôts a favôr su 694, di une risoluzion a pro di lenghis, dirits e minorancis, che di une bande e va daûr di une lungje rie di proviodiments di cheste fate fats bogns inte aule di Strasburc in cuarante agns, ma di chê altre e à une sô particolaritât, une vore impuartante. Cun di fat, cun chel document discutût tra i 14 e i 16 di Dicembar stâts e passât, il PE nol à dome tornât a palesâ la sô atenzion viers di une cuistion che e tocje in chel istès democrazie, citadinance, pluralisim, culture e coesion sociâl, ma al à dât la sô poie formâl e sostanziâl ae iniziative dai citadins europeans clamade Minority SafePack, che e domande ae UE di indotâsi di une normative specifiche in cont de tutele des minorancis a nivel european.
◆ Cun chel intindiment, tra il 2017 e il 2018 passe un milion e tresinte di lôr (1.128.000 lis firmis validadis), in ducj i Stâts membris de UE, a vevin firmât chê che a nivel european, cuntune buine aprossimazion, e je une sorte di propueste di leç di iniziative popolâr. Vie pal 2020 i siei contignûts a son stâts frontâts in plui ocasions intai palaçs di Brussels e Strasburc e par chel, dopo de risoluzion dal PE si spietave dome che la Comission, ancje daûr de solecitazion dal PE, e cjapàs sù il Minority SafePack par che al deventàs un at cun fuarce juridiche.
◆ Magari cussì no, ai 15 di Zenâr stâts la CE e à rispuindût, cu la sô vicepresidente, Věra Jourová, responsabile pai valôrs de UE e pe trasparence, che lis cuistions fatis indenant a son impuartantis pe Union, ma che nol covente rivâ ae aprovazion di un at juridic di pueste, stant che pe tutele des minorancis, dai dirits linguistics e des lenghis minorizadis a son avonde la normative e lis politichis za in vore.
◆ Si podarès dî che la CE ur à sierât la puarte in muse no dome ai firmataris dal MinoritySafePack e ai 50 milions di citadins europeans che a fasin part di minorancis linguistichis o nazionâls, ma ben a ducj i citadins de UE e ae lôr voie di esprimi une citadinance ative e partecipe. Lu à dit a clâr il president de FUEN (la Union Federâl des Nazionalitâts de Europe, che e à coordenât la iniziative dai citadins), l’eurodeputât Loránt Vincze, component de minorance ongjarese in Romanie. Critichis ae Comission a son rivadis ancje de ALE (Aleance Libare Europeane), il partît politic european che al ten dongje diviersis fuarcis che a son espressions di minorancis e nazionalitâts, intant che sù par jù setante eurodeputâts de plui part dai grups parlamentârs a àn fat sintî daurman la lôr vôs, cuntune note indreçade ae CE e, tacant de mozion di censure fate buine dal Parlament de Provincie de Frisie, ancje intes diviersis comunitâts a son stadis inviadis iniziativis di cheste fate.
◆ La rispueste de CE e je stade un brut colp, cundut achel il Minority SafePack nol è lât sù pai stecs, almancul par doi motîfs: parcè che la atenzion su chês cuistions e reste alte e parcè che la Comission e podarès cambiâ idee plui indenant. Sperìn che al sedi cussì, a pro di lenghis, dirits e minorancis e a pro de Europe e dal so avignî ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +