FRIÛL EUROPE. A Bruxelles e a Udin si domande un rilanç de Europe «unide te diversitât»

Votazions, inovâi e iniziativis par fâ il pont de situazion e par rilançâ la integrazion europeane, la partecipazion democratiche e i dirits dai citadins. In Europe si cjate une continuitât di fonde tra il mês di Mai a pene passât e chel di Jugn. Cun di fat ai 23 di chest mês tal Ream Unît, là che si à votât ai 5 di Mai pes aministrativis e pai parlaments di Scozie, Gales e Irlande dal Nord, si fasarà il referendum in cont de permanence o mancul di chel Stât dentri de Union europeane e trê dîs plui tart a tornaran a votâ, ma pes elezions politichis, ancje i citadins dal Ream di Spagne.
In particolâr al sarà il moment de veretât pe cussì clamade “brexit”. Dai sondaçs fats un mês prime dal vôt a saltin fûr indicazions a pro de vitorie di chei che no vuelin tirâsi fûr de Ue. Cheste tindince e somee cressi cul svicinâsi de consultazion, ma se e les intune maniere contrarie, in tancj di lôr no àn dubis: in chel istès che la Grande Bretagne si gjavàs de Union, la Scozie e sburtarès daurman pe indipendence e pe “jentrade in Europe”. A son pronostics che a cjatin conferme tal sucès eletorâl dal Partît nazionâl scozês (SNP) di un mês indaûr, cuant che ancje il Partît nazionâl galês (PC) al à jonzût un bon sucès, cemût che si pues lei plui in detai tal articul chi a çampe.
A son stadis calcoladis tant che une sorte di referendum su la Europe e suntune cierte idee di europe ancje lis elezion presidenziâls in austrie, là che te balotazion dai 22 di Mai al à vinçût, cuntun 0,6% di vantaç sul liberâl nazionalist Norbert Hofer, il candidât ecologjist e europeist Alexander Van der Bellen. Une buine gnove pe Austrie e par dut il continent, ma ancje la conferme de esistence di chê polarizazion, tra pôris e sperancis e tra ideis dai prejudizis, che e segne lis societâts europeanis contemporaniis.
Tal stât spagnûl, dopo che des elezions di Dicembar dal 2015 nol è saltât fûr nissun guvier, cussì ai 26 di Jugn si varan di elei lis gnovis Cortes. La situazion e somee ancje chest viaç avonde incierte, cundut de novitât, a çampe, de aleance tra Podemos e Izquierda Unida. Viodarìn ce che al nas, in particolâr tai Paîs Catalans, tal Paîs Basc e in Galizie.
Il 1n di Jugn, par intant, a Bruxelles, i grups dai Verts/Aleance libare europeane (ALE-EFA) e de Çampe unitarie europeane/Çampe nordiche verde (GUE/NGL) dal Parlament european, adun cu la Rêt europeane pe paritât des lenghis (ELEN), a àn inmaneât une cunvigne dal titul Respecting linguistic diversity? Language discrimination in the EU. Cun chê di denunziâ lis discriminazions che a vegnin patidis de bande dai citadins europeans che a fasin part des minorancis e di sburtâ la metude in vore de normative di tutele che za e esist e il disvilup di gnovis azions a pro dal ricognossiment concret dai dirits linguistics a ducj i nivei, si àn dât dongje eurodeputâts, esponents di associazions e organizazions espression des diviersis comunitâts e rapresentants de Comission europeane, dal Consei de Europe, de OSCE e des Nazions Unidis.
Di chescj argoments si à fevelât ancje a Udin, ai 23 di Mai, alì de Universitât, inte suaze de tierce edizion de taule taronde Friûl@Europe. Cun chê di memoreâ il trentesim inovâl de muart di Altiero Spinelli e di ricuardâ la sô persone, la sô ativitât e il so impegn a pro de Europe unide, si à fat cualchi resonament in cont de Europe che e je e di chê che e mancje e che nus covente. La atenzion e je stade pontade propit viers dai dirits des minorancis, de informazion e de promozion de diversitât linguistiche, a tacâ de realtât de regjon Friûl-VJ. ❚
Marco Stolfo