FRIÛL EUROPE. 2014, Odissee pai dirits

Il dirit ae autodeterminazion, lis mobilitazions pai dirits di fonde, i referendums pe indipendence, la soluzion dai conflits. Il 2014 in Europe, massime pes minorancis e pes nazionalitâts, al è un an impuartant. Dut chest al è saltât fûr za sul imprin, a tacâ dai 11 di Zenâr stâts, cuant che a Bilbao e je stade une manifestazion grandiose, cun passe 130mil personis che si son dadis adun par domandâ ‘Giza Eskubideak, Bakea, Konponbidea’, ven a dî ‘Dirits umans, pâs, soluzion dal conflit’. In place a jerin i rapresentants di ducj i partîts bascs, de EAJ-PNV (Partît nazionalist basc) aes fuarcis progressistis ‘abertzales’ Eusko Alkaratsuna, Aralar, Sortu e  Alternatiba, e di diviersis organizazions sindicâls.
Il corteu al veve ancje chê di rilançâ la cuistion dai dirits dai prisonîrs politics bascs, argoment di une manifestazion programade za timp indaûr e improibide de bande di un judiç spagnûl, e par chest, cemût che al à declarât il puartevôs di Sortu, Pernando Barrena, e je deventade une manifestazion a pro de difese de libertât di opinion e di espression. E je stade ancje une gnove dimostrazion de volontât di pâs e justizie tal Paîs Basc che e je sot dai voi di dut il mont.
Une altre cuistion che e je simpri vierte tal Stât spagnûl e tocje chel che in Catalogne al ven clamât il dirit di decidi, ven a dî la celebrazion dal referendum su la autodeterminazion domandât des fuarcis sovranistis, CiU, ERC, ICV-EUiA e CUP, che a metin adun la maiorance dai elets dal Parlament catalan. Il referendum al varès di davuelzisi ai 9 di Novembar di chest an, ma il guvier di Madrid lu considere incostituzionâl.
Un vôt pe indipendence che impen si fasarà par sigûr al è chel de Scozie: l’apontament al è pai 18 di Setembar. Pal Partît nazionâl scozês e pai Verts, che a son a pro de indipendence, votâ a pro al vûl dî vierzi la strade par vê une Scozie miôr.
La cuistion de autodeterminazion e tocje ancje il Tirôl dal Sud, là che ai 12 di Zenâr stâts la Süd-Tiroler Freiheit (SF) e à fat indenant i risultâts di une consultazion inmaneade de bande di chel partît. La iniziative no à valôr legâl ma e je avonde significative, stant che a àn votât, par pueste o par internet, passe 61mil di lôr (il 300% dai 20mil vôts cjapâts de SF tes ultimis elezions regjonâls) e il risultât a pro al è stât dal 92,17%.  ❚
✒ Marco Stolfo