Sfuei Mensîl Furlan Indipendent
Archivi de Patrie

AUSTRIE. I gnûfs ministris Sorprese te ÖVP: Kurz gnûf ministri dai Afârs cul forest austriac. Al è il plui zovin sorestant de diplomazie in Europe

............

Trê mês dopo lis elezions, la SPÖ e la ÖVP si son metudis dacuardi di lâ indenant cu la viere grande coalizion. Ce sorprese! Come in Gjermanie, dulà che o vin viodût un svilup cuasi paralêl, i eletôrs no capissin parcè che al sedi coventât tant par rivâ a chest risultât che al è, matematichementri, l’unic pussibil. Ancje i prins puescj a jerin plui che clârs: al volant il paron de çampe Werner Faymann e, tant che secont pilote, il conservadôr Michael Spindelegger. Dentri de scuadre de SPÖ nol cambie plui o mancul nuie; al contrari, Spindelegger, malcontent di no jessi deventât cancelîr, al à decidût di cambiâ il so personâl.
Gnove ministre de Zoventût e de Famee e je la ricercjadore e fondadore dal istitût di ricercje di marcjât “Karmasin Motivforschung”, Sophie Karmasin. Il Ministeri de Economie di Reinhold Mitterlehner al piert chestis agjendis: al puest di chel, al cjape la Sience e la Ricercje.
Il tirolês Andrä Rupprechter al è il sucessôr dal ministri de Agricolture Nikolaus Berlakovich. Il Ministri de Justizie è diventât l’avocat di afârs Wolfgang Brandstetter. Fûr de scuadre di guvier a saran Beatrix Karl (Justizie) e Fekter (Financis). Lis Financis a passin a Spindelegger: il Ministeri dai Afârs cul forest, adun cu lis agjendis de integrazion dai migrants, lu oten di fat il so braç diestri, il student Sebastian Kurz.
Il segretariât pe integrazion impastanât dome doi agns fa al è za storie. La integrazion dai imigrâts e je stade une des prioritâts dai conservadôrs e cussì al pâr di strani che no vuelin lâ indenant cun cheste agjende. Alev Korun dai Verts al critiche la decision di sierâ cheste istituzion: al stime che il teme al sedi masse impuartant e che al rivuardi il nestri futûr; duncje, meti la integrazion tal ministeri dai Afârs cul forest al è stimât tant che un erôr grâf, che si paiarà plui indenant.
***
Il plui zovin sorestant de diplomazie in Europe
No dome pal schi, ma ancje in politiche, la republiche alpine nus presente un gnûf record. Il student di dome 27 agns Sebastian Kurz al è il gnûf ministri dai Afârs cul forest. Al è il plui zovin sorestant de diplomazie in Europe e, daûr ”Digischool.fr”, une plateforme internet francese dai students, al à otignût ancje il titul di ”Student dal an 2013”. Kurz al à vinçût il titul te classifiche dai “10 students che à son rivât a un sucès straordenari tal 2013.”
Se chê sielte e significhi un vantaç pe Austrie o se si riveli cussì la assurditât politiche dal paîs, si discut atualmentri tai cafês de capitâl. Il student, che nol è rivât adore a completâ i siei studis, al pues ringraciâ pe sô cariere il vice cancelîr Spindelegger.
Dal 2003 al è membri dal JVP a Viene, la organizazion dai zovins dal partît conservadôr. Za tal 2009 al è stât elet cul 99% dai vôts dai delegâts tant che president federâl dal JVP. Tal stes an al devente ancje vice president dal partît ÖVP a Viene. Pôc dopo, te campagne eletorâl di Viene, al bute fûr la campagne “metropolitane vierte 24 oris su 24”, cuntune largje cuviertidure mediatiche.
Spindelegger, che tai ultins agns al sta cirint di mudâ il so caratar, descrit tai gjornâi tant che noiôs e grîs, al vûl mostrâ – cul supuart de cariere dal zovin student – di jessi inovatîf e moderni. Cussì si spieghe la sô decision di vê clamât il zovin Kurz tant che braç diestri al ministeri dai Internis, come Segretari pe integrazion, e di puartâlu cumò indenant a cjâf dal ministeri.
In struc, o notìn che no je la formazion e la cualificazion professionâl che e decît cui che al è la persone plui juste e buine di condusi un ministeri; dispès, come in chest câs, o stin cjalant un teatri politic dulà che ducj a vuelin complasê il public. ❚
Janez Erat

Ultime ore / Cungjò, Omar

Redazion
La redazion de La Patrie dal Friûl e pant il so corot pe pierdite di Omar Monestier. Un om e un professionist esemplâr che ae direzion dal Messaggero Veneto e de Il Piccolo al à simpri mostrât grande sensibilitât e atenzion ancje pal nestri gjornâl e pe comugne dai nestris letôrs. Nus mancjaran la profonditât, […] lei di plui +

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +