Friûl assediât dal ciment

Ognidun che al vedi fate la strade che e puarte di Udin a Tarcint, o la statâl 56 di Cormons a Udin o che al vedi frecuentadis lis zonis periurbanis di Pordenon, si sarà rindût cont di cetant che sedi stât costruît intai ultins decenis, e cetant che al sedi stât fat cence criteri, costruint dispès a magle di leopart al di fûr di un scheme.
Lis areis agriculis intai ultins agns si son ritiradis une vore a pro dal ciment di centris comerciâi, capanons e palacinis; dispès formis di speculazion finanziarie.
I dâts in realtât a son cognossûts di timp, ma al pâr che nissun al vedi cjapade cussience. Par esempli, fra i agns ’80 e 2000 a son stâts urbanizâts plui di 6.000 etars di superficie, tant che un cjamp di balon in dì. In vincj agns, al è come se o vessin fat altris dôs citâts des dimensions di Udin!
Tal mieç di chest, la inerzie de Regjon e dai comuns che no son daûr a fâ nuie par impedî la pierdite di teren agricul. Anzit, a son dispès i autôrs di chestis cimentificazions dulà che si va indevant a costruî cence une vision organiche dal teritori. E al è forsit chest, il probleme. A son stadis almancul cuatri lis provis di butâ jù un gnûf plan di guvier dal teritori regjonâl che al è fer al 1978! Dutis naufragadis in maniere scandalose.
Intant, associazions ambientalistis, comitâts e citadins si cjatin a fâ i conts cun progjets invasîfs in dute la regjon, de impreteribile gnove aree residenziâl fin ai centris comerciâi e turistics.
La leç finanziarie di fin 2011, varade de aministrazion Tondo, e à introdusût par altri la pussibilitât di meti intai plans urbanistics comunâi progjets che a sedin judicâts di impuartance regjonâl, nazionâl o internazionâl. Une norme che e je daûr a funzionâ tant che cjaval di Troie pe localizazion di iniziativis che a sfadiavin a cjatâ une colocazion.
E je lade cussì pal centri golfistic internazionâl che si è daûr a progjetâ tra Cjasteons di Strade e Bicinins. Un colòs di 110 etars e 250 mil metris cubis di edificis fra residencis golfistichis, albierc e une aree comerciâl. E une strade simile le sta fasint l’autodrom di Lavarian (plui o mancul 40 etars).
Ma a son tancj altris progjets invasîfs, ducj propagandâts creant ilusions e spietis di grancj puescj di vore, in realtât dificii di verificâ.
Ma valie la pene viodi distrute par simpri la nestre tiere? E cun jê, tradizions e culture? Al va dit che, une volte cimentificade une aree, nol è plui pussibil tornâ indaûr, dal moment che al ven distrut chel strât superficiâl che al è vîf e vitâl. Chê stesse tiere che par milenis nus à nudrîts e che forsit propit in timps di crisi e larès riscuvierte a pro di economiis locâls. Al è chel che, par esempli, al è sucedût a Merêt di Tombe dulà che terens di proprietât comune a son stâts convertîts de produzion di blave (pôc reditizie) a chê dal forment  che cumò al è domandât di diviers fors locâi e al à duncje marcjât. Testemoneance che forsit al è pussibil cjalâ viers altris formis di disvilup.
A chei che a disin che il setôr edilizi al è impuartant, o rispuindìn che al è vêr. Ma chest al varès di ocupâsi no di costruî, ma di tornâ a progjetâ ce che za al esist. O vin un patrimoni edilizi vieri: pensìn par esempli a ducj i edificis realizâts intai agns ’50 e ’60 che a podaressin jessi ricostruîts o ricualificâts cun tecnichis di sparagn energjetic (e antisismics). Pensìn aes casermis dismetudis intal cûr di tancj paîs e citâts: a podaressin jessi la ocasion par rigjenerâ chês areis, fasint edilizie popolâr par dâ cjase a cui che no se pues permeti. Dut chest al varès ricjadudis economichis leadis ai puescj di vore e a un cost energjetic plui bas dai edificis, cence fevelâ dal discors ambientâl. Ma a coventin politichis organichis par fâ chest; e vuê no son.
Bisugne dineâ il mît dal disvilup ilimitât, fat dome di palacinis e capanons, chel stes disvilup che nus à puartâts intal stât di crisi economiche atuâl. O podìn, e o vin di pensâ, a altris mûts par vivi, tornant a crodi inte tiere e a rispietâle. ❚
✒ Luca Cadez, Responsabil dal Teritori par Legambiente FVG