EDITORIÂL – Svendude ancje le muse par un svolet di colibrîs

✽✽ Me àn contade cussì e o crôt che e sedi vere.  Dopo la presentazion dal avion cun piturâts i colibrîs, de sede di Turismo FVg e partìs une telefonade ai gjestôrs de isule de Cone, il centri naturalistic sul Lusinç. Ur domandin se a puedin ospitâ une troupe de Rai che e à voie di fâ un servizi sui ucieluts. A chei de Cone ur ven di ridi, ma a disin di sì par fâ publicitât al sît. Ducj contents, duncje: chei di TurismoFvg che a àn puartade indenant la promozion, la Rai che e pues fâ il servizi e chei de Cone che a van par television.
✽✽ E somee une monade, ma pensait a ce nivel di incompetence che o sin rivâts. Lassìn in bande chei de isule, che pardabon a àn fat ben a mostrâ la bielece di cheste bande dal Friûl e la sô maravee di nature, e viodìn invezit la ignorance di cui che al varès il dovê di savê.
✽✽ Ce volêso che al sedi pensâ che il colibrì al è un ucielut furlan par chei che no san nancje dulà che al è il Friûl? Ce volêso che al sedi par chei gjenis di TurismoFVG crodi che il colibrì al svoli sul Lusinç? No san nuie, ma a pretindin di fâ lis robis par cont e in non nestri.
Dut chest, par no fevelâ de sielte dal ucielut al puest de acuile che di un pieç, ancje se no je mai plasude a triestins e socis, e sta ancje tal confenon de Regjon. Visìnsi, no je la nestre, biele cun zâl e blu, fuarte e gloriose tes mans dai Patriarcjis. No, e je la version talianote che no dîs nuie. Ma ancje cheste figure e da fastidi a chei che di simpri a pensin a fânus pierdi la nestre storie.
✽✽ Us disarai di plui: a stan fasint un gran scjas su la cuistion de specialitât e de riforme dal titul V di Renzi. Ducj a Rome a vaî in non de autonomie. Po dopo, tu vâs a lei lis declarazions dai nestris sorestants e tu cjatis dome une difese pontade su cuistion economichis.
✽✽ Come che la nestre specialitât e fos une forme di formadi di difindi de concorence foreste: Montâs cuintri Emmenthal, a chest le àn ridusude. ❚
Dree Valcic