Domenie ai 13 di Lui, in ocasion de fieste dai sants Ermacure e Furtunât, e je stade celebrade te Basiliche mari di Aquilee la messe grande di Avôt par dut il Friûl. Al è un apontament impuartant e significatîf che Glesie Furlane e ten vîf in maniere continuative di cuarante agns in ca.
Numerose la partecipazion dai fedêi e une di biele rie di predis che a àn concelebrât. La funzion principâl cheste volte le à vude pre Rizieri De Tina, plevan di Nimis, che te predicje al à riclamade la atualitât, ancje pal mont di vuê, de testemoneance di chescj doi sants martars. Ermacure, prin vescul di Aquilee, e Furtunât so diacun, cul sacrifici de lôr vite a àn plantade chenti la prime comunitât cristiane fondade sul amôr, sul servizi, sul vanzeli, no su la prepotence, sul podê o su la cariere. Testemoneance indispensabile ancje in dì di vuê.
La liturgjie e je stade compagnade dal grop corâl “Vôs di Vilegnove” di San Denêl.
Presint a la celebrazion a jerin ancje l’assessôr regjonâl a la agricolture Claudio Violin e il president de Provincie di Udin Pieri Fontanin.
La fieste si è concludude cuntun ghiringhel al ristorant “Ai Patriarchi” par ducj i partecipants, biele ocasion par stâ ancjemò un pâr di oris in compagnie e serenitât.
