Un progjet pe educazion ai gnûfs imprescj di comunicazion

La associazion Media Edu-cazione Comunità (Mec) e à presentât civix.fvg.it, la plateforme in rêt pe educazion civiche e la citadinance digjitâl, un progjet sostignût de Fondazione Friuli e de Regjon che al rive ae sô tierce anualitât. Il progjet al è stât presentât ai 13 di Otubar te sede de Regjon a Udin, li che a jerin presints 120 tra insegnants e dirigjents scolastics, dongje dai referents de polizie postâl e dai rapresentants des aziendis dal digjitâl plui grandis in Friûl. «Il percors inviât de associazion Mec – al à dit Giuseppe Morandini, president di Fondazione Friuli – al pant il desideri di lavorâ ancje sui temis dal rispiet e des emozions in rêt, un passaç fondamentâl par fâi cuintri al lengaç de tristerie, che masse dispès o cjatìn sui media».
◆ Une volte che si à fate la iscrizion su civix.fvg.it si podarà acedi ai materiâi didatics metûts adun dai formadôrs di Mec cu la colaborazion dai insegnants, che a coventin pe promozion des competencis di citadinance digjitâl e di un ûs cussient des gnovis tecnologjiis. Par supuartâ la costruzion di un curriculum verticâl pe citadinance digjitâl, si à dividût l’argoment in siet areis tematichis, metudis dongje in trê macro areis che a son adatis a ducj i ciclis scolastics, cun tant di schedis didatichis coerentis cu lis diviersis etâts dai students, e dai nivei di aprofondiment. E po, al è il “patentin dal smartphone”: «Al è un progjet struturât – al à spiegât Giacomo Trevisan di Mec – cun contignûts multimediâi e struments di valutazion par aciertâ la acuisizion di bande dai students des competencis minimis, par navigâ in rêt cun cussience. La sperimentazion e tacarà in dîs scuelis pilotis de regjon». Di bande sô, la Regjon e à afidât a Mec il servizi di sportel regjonâl dal cyberbullisim par implementâ lis azions di contrast al fenomen: un operadôr si ativarà dentri di 24 oris de richieste des scuelis par supuartâ i câs specifics di ûs impropri dai dispositîfs digjitâi.
◆ Sul teme de conetivitât, simpri la Regjon e à fat bon un intervent di 5 milions par che i istitûts a sedin cuvierts al 100%, lis scuelis mezanis al 58%, lis elementârs al 48%, e la infanzie al 47%: «In graciis de colaborazion cu lis fondazions – e à dit la assessore regjonâl Alessia Rosolen – a son za stadis inviadis azions impuartantis tant che il contribût di 450 mil euros pal Manzini di Sant Denêl par comprâ strumentazion, creâ un catalic di percors didatics in ambient digjitâl, e formâ i docents ae educazion cuintri dal cyberbullisim. A chest si zonte il contribût di 745 mil euros destinâts aes istituzions scolastichis par comprâ computers portatii, tablets cul microfon, speakers, webcams e clavutis Wifi di dâ in comodât di ûs dai arlêfs che a àn plui problemis tai colegaments inte istruzion a distance. Infin, e je ancje la colaborazion cun Mec e cu la rêt des scuelis dal Sbilf par ativâ percors di teledidatiche». ❚