E je Micol Tami Della Rovere, 28 agns di Cormons, la prime laureade tal cors di lauree magjistrâl in gjestion dal turisim culturâl e dai events, de Universitât dal Friûl. Si trate di un cors inviât dal dipartiment di studis umanistics e patrimoni culturâl che al è poiât e finanziât de Fondazione Friuli: il percors di studi al va a completâ il cors trienâl in Siencis e tecnichis dal turisim culturâl. La prime lauree si è vude ai 21 di Novembar a palaç Gusmani a Udin.
Cheste gnove direzion di studis si concentre te gjestion dal turisim culturâl, ven a stâi chel praticât di cui che al vûl cognossi monuments, glesiis, museus, cjistiei, ma ancje par visitâ mostris e partecipâ a grancj events. Al è chel che vuê a clamin turisim lent e che in Friûl al sta cjapant simpri plui pît, ancje par vie dal svilup dai percors ciclabii tant che l’Alpe Adria.
La prime laureade, Micol Tami Della Rovere, e veve fat za doi masters in global marketing e studis internazionâi, ma istès e à volût aprofondî ancje chel cantin che cumò si inserìs tal so curriculum: «Lu ai fat par interès personâl – e conte la zovine -, par vie che o soi di Cormons e o crôt tes cualitâts dal nestri teritori e tai siei prodots, tacant dal vin che aromai al è un brand de nestre regjon».
La gnove lauree magjistrâl e ufrìs pussibilitâts di ocupazion in impresis privadis tant che agriturisims e aziendis viniculis, colaborazions cun uficis stampe e realtâts dal setôr. Tal stes timp e pues formâ figuris dirigjenziâls te promozion dal teritori o inte organizazion di events culturâls, espositîfs e sportîfs. Cun di plui, il cors si fâs dut par inglês, di maniere di trasmeti ai students la capacitâts di doprâ la lenghe foreste tai siei aspiets tecnics leâts al turisim: «Mi è plasût – e dîs inmò Tami – l’aspiet concret di chest cors, cun tancj laboratoris e visitis tes aziendis. Te mê tesi o ai frontât il terroir, ven a stâi une aree limitade che e permet la produzion di un vin che si identifiche cul teritori, e cemût che chest fat al sedi leât a di une diplomazie informâl te strategjie di vendite dai vins furlans. Mi plasarès deventâ ambassadore de nestre regjon inte promozion di prodots tant che il vin». ❚
Piero Cargnelutti
