«Cjasa / dai Cuntins / comuniscj / scomunicâts / Pasca / a benedî li cjasis / al plevan sul porton / Podio vignî / l’agna Griselda: / la puarta di Cuntin / a je simpri stada viarta”.
Carmelo Contin, daspò di une vite di impegn sociâl, politic, culturâl, si à inacuart di vê tantis robis di podê contâ e ancje di sei bon di contâlis in poesie. Ma no vin di cirî in chest librut di cuasi 100 pagjinis publicât de Kappa Vu (33 composizions furlanis cu la traduzion taliane in bas des pagjinis) il viers otonari o chel endecasilabi, o une cualsisei metriche. La poesie di Contin e je sintesi, e je la peraule ugnule che e dîs tant. E alore lis storiis di vite che al conte a son flash che a vierzin une prospetive su la realtât storiche. Realtât dure sicu che e jere dure la tiere che a vevin di svangjâ i spondins (chei che a prontavin lis fuessis, i fossâi), pesante la glerie che a vevin di cjariâ i cjaradôrs, lungje la fadie dai falçadôrs e dai muredôrs, mareôs il pan dai emigrants.
E, come se nol fos vonde dut chest tribulâ, ve che e ven dongje la vuere. Che i puarte vie a Carmelo un fradi e che e semene muart e distruzion scuasi in ogni famee furlane (baste pensâ ae teribile campagne di Russie). Sclesis, insome, chei tocuts di len che a son bogns di impirâsi pardut, massime sot des ongulis, li che a fasin un mâl boie. Al vignarès di dî che Contin al à propit chê di meti sclesis intes ongulis dai siôrs e dai potents, par che si rindin cont che la lôr ricjece e nas intal sanc de puare int. Int che e à une dignitât sclete e vere ancje inte miserie.
No mancjin nancje moments lirics, tant che la vision de “gardelina muta” che e lasse il cîl vedul dal so cjant, o ben la Tiara che e à bisugne di jessi medeade par podê continuâ a zirâ. E no mancjin nancje riferiments ae atualitât: la ultime poesie e à par titul “Giulio” e no coventin altris peraulis par capî che e fevele di chel puar zovin che al rapresente une feride vierte no dome pe sô famee, ma par ducj chei che a àn fam di veretât.
Il libri al è insiorât di une presentazion di Mario Matassi e di vot dissens o fotografiis in teme perfet cui contignûts che il libri stes al trate. ❚
Laurin Zuan Nardin