FONDAZIONE FRIULI. Dal Uccellis al mont pedalant in biciclete

La biciclete viodude a 360 grâts dai students. O fevelin dal progjet “Passeggiando in bicicletta” realizât da students dal Educandât Uccellis di Udin in graciis de poie de Fondazione Friuli midiant di un contribût che al rive dal bant istruzion 2020. Cun chei fonts, 150 students des classis secondis a àn puartât indenant dilunc dal an scolastic 2020/2021 un progjet dedicât ae biciclete e ae mobilitât lente: «E je une iniziative – a spieghin lis insegnantis Francesca Battocletti e Mara Bona – che o vin inviât tal periodi dal prin lockdown cu la idee di tornâ a une vite normâl e ancje pe richieste dai students che a domandavin un imprest par stâ insiemi tal viert».
◆ E cussì si à puartât indenant un progjet che al à coinvolt cuasi dutis lis materiis: de gjinastiche dulà che si à analizât il moviment e il benstâ che il moviment al puarte, ae gjeografie dulà che i fantats a àn segnât diviers percors tal teritori furlan che si puedin percori, par rivâ ae lenghe taliane e a chês forestis par vie che si à scrit un diari dal progjet po voltât ancje par inglês. Ma si à fevelât ancje di alimentazion e no si à di dismenteâ che al Uccellis a studiin zovins che a vegnin di diviers paîs: «Ta cheste maniere – e spieghe Battocletti – i students a àn podût confrontâ l’ûs de biciclete tes diviersis culturis. In particolâr, al è stât interessant il lavôr fat cu la insegnante di lenghe cinese. O savìn che in Cine la biciclete e à un significât particolâr, e chest al è stât un motîf di confront une vore impuartant pe lôr formazion».
◆ Il progjet al à previodût ancje la realizazion di une brochure pai turiscj e in curt il tant materiâl produsût al vignarà inserît tun portâl internet.
◆ Ce che no si à rivât a fâ par vie de pandemie al è stât un zîr in biciclete dilunc la piste Alpe Adria di bande di ducj i students che a àn lavorât al progjet, ancje se un pâr di lôr l’an passât a àn rivât a fâ la trate Tarvis-Cjargne. Cumò si pense, cuant che e sarà la ocasion, di menâju te Basse des bandis di Aquilee: «O crodìn – e dîs Battocletti – che a saran dal sigûr altris pussibilitâts di meti in vore il progjet ancje dal pont di viste pratic, ancje parcè che aromai chest progjet al è jentrât inte programazion didatiche e al vignarà puartât indenant tai prossims agns in graciis dal jutori de Fondazione Friuli che o ringraciìn pe poie che nus à simpri dât». ❚