Sfuei Mensîl Furlan Indipendent
Archivi de Patrie

FONDAZIONE FRIULI. Cun Audimus la musiche sinfoniche e rive tai paîs

............

La musiche sinfoniche e classiche e pues rivâ ancje tai lûcs plui periferics, e no dome tai grancj teatris des citâts furlanis cjâf lûc. Chest al è pussibil ancje in gracie de ativitât de associazion Audimus (Artiscj Unîts pe Difusion de Musiche Strumentâl), une des gnovis realtâts che la Fondazione Friuli e à decidût di sostignî, chest an pe prime volte. Cheste realtât associative e nas intal 2012 cul obietîf di meti dongje une propueste musicâl alte che e podedi jessi presentade tes realtâts piçulis: «O vin creât – al spieghe Francesco Gioia, president di Audimus – une scuadre di musiciscj di divierse etât, dai 18 fintremai ai 40 agns, che e pues presentâ oparis mestris de musiche sinfoniche e classiche tes realtâts plui piçulis tant che Paulâr, Puçui e Pradaman, e no dome tai grancj teatris tant che il “Nuovo” di Udin. O crodìn che cheste musiche e podedi jessi preseade e fate cognossi miôr cussì».

Jenfri i apontaments proponût vie pal Istât di Audimus a son il conciert dai 31 di Lui a Paulâr par ricuardâ il mestri Giovanni Canciani sunant lis sôs composizions, chel cui trê otons Paolo Armato (cuar), Stefano Flaibani (trombe) e Rocco Rescigno (trombon) tal domo di Udin ai 2 di Avost: a chescj, si zonte il conciert in program ai 5 di Setembar te glesie di Lignan dulà che si proponarà musiche sinfoniche.

In chescj 7 agns di ativitât, Audimus e à za inmaneât une trentine di events e dal sigûr cumò la poie de Fondazione Friuli e judarà a facilitâ cheste ativitât impuartante di promozion musicâl: «In dut – al conte Francesco Gioia – o vin 35 musiciscj che ancje pe etât divierse si insegnin fra di lôr, cence dismenteâ che cheste e je ancje une pussibilitât di fâ esperience pai plui zovins. Nô o podìn proponi une orchestre interie, ma ancje grups plui piçui par musiche di cjamare. O vin viodût che la rispueste dal public e je une vore positive: di fat, i musiciscj no son ducj professioniscj, ma a son ducj une vore preparâts. Intun moment come chest che la Orchestre Mitteleurope e à cualchi probleme e e à di jessi riformade, al è inmò plui impuartant mantignî alte la propueste musicâl ta chest setôr. Al è clâr che no podìn garantî la stesse cualitât de Mitteleuropa, che o sperìn di tornâ a viodi operative, ma o sin contents di dâ il nestri contribût». ❚

Piero Cargnelutti

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +