Un benstâ familiâr che si inmanee cun diviersis azions tant che la creazion di cerclis virtuôs di volontariât, la poie ae domiciliaritât par un invecjament atîf e il coinvolziment dai plui zovins te comunitât. O fevelìn di “Welfare di famiglia: promotori di salute per la comunità”, il progjet puartât indenant za di doi agns de cooperative “Athena – Città della psicologia”, sostignût de Fondazione Friuli midiant dal bant welfare. La Coop Athena e je nassude tal 2014: e met adun un grup di professioniscj tal cjamp de psicologjie, de psicoterapie, ma ancje miedis e assistents sociâi. Cheste scuadre e à inviât cun chest progjet une schirie di ativitâts che a interessin sedi lis fameis che i anzians: «O lavorìn – e spieghe la presidente Giuseppina Guarino – cu lis fameis che a dan acet a fruts in afidament, par judâlis a frontâ la situazion, ma ancje cun chês che a àn anzians, e ancje in chel câs o din il nestri contribût par rindi plui semplice la gjestion. E po, o promovìn cors di formazion, a pro dai ambits sanitaris». Athena a Tarcint e puarte indenant azions sul afidament familiâr, a Udin cors par potenziâ lis competencis familiâr e e je operative ancje a San Zorç di Nojâr e Çarvignan, frontant temis tant che la demence in tarde etât. Dut chest al ven fat midiant de colaborazion cui distrets sanitaris ma ancje cuntune vore di realtâts culturâls tant che i grups teatrâi “Teatro del silenzio” e “Brat”, doprant la culture come stimul pes emozions par cirî di fâ cressi lis personis e di rindilis autonomis, ma ancje cun altris realtâts tant che il centri servizis volontariât, par coordenâsi. Un lavôr impuartant che cu la emergjence coronavirus lu divente inmò di plui, viodût che chest al à puartât i fruts a stâ lontans de scuele e al riscje di causâ l’isolament dai vielis: «Alc o vin za inviât – e dîs Guarino – come par esempli lis videoconferencis par dâ indicazions aes fameis. Cui plui anzians, o pensìn di doprâ i tablets par permetiur di jessi colegâts, ma ancje altris robis: une idee e je chê di colaborâ cu lis radios locâls par insuazâ programs dedicâts a lôr». ❚
