Il cjantautôr cjargnel e la musiche furlane di autôr e di tradizion
Ancje in tims di pandemie, la musiche no si ferme. Nancje chê furlane clarementri, che e à dât espression di se in tantis manieris, e tra lis plui significativis o ricuardìn ancjemò une volte “Incuintri al doman”, l’imni de Patrie dal Friûl che al è stât presentât intune forme gnove e visuâl, in ocasion de Fieste de Patrie dai 3 di Avrîl, che però purtrop no si è podude festezâ come simpri dal vîf.
◆ O vin di cjalâ e di scoltâ cun grande passion e atenzion ancje il lavôr tant interessant che al è daûr a fâ il nestri cjantautôr cjargnel Lino Straulino, che nol à sigûr bisugne di presentazions. In timps di segregazion sfuarçade – lui bielzà salvadi sot cierts aspiets, ancje se tal stes timp une vore uman e comunicatîf – al sta metint adun une antologjie di musiche di autôr furlane, cjapant cjants pe plui part di forme corâl, rangjant par ghitare e par vôs cheste ereditât varie e vivarose, intune maniere dal dut personâl che e funzione cetant ben. Contribûts che al regale sul so profîl facebook, par une racuelte che si spere di podê in curt scoltâ dal vîf o di cjatâle su cd. Nus conte Lino: «E je une storie che e jere tal aiar za di un pôc di timp, e cumò che o vin di stâ dentri si à inmò plui timp, e duncje le ai puartade indevant. O ai cjapât in man, midiant di ricercjis e libris, cheste musiche di autôr furlane, che si met intune posizion pardabon particolâr e dongje de musiche popolâr. Bisugne sigûr distingui chê che e je tradizion e chê che e je robe scrite. Tantis cjançons a son di autôr ma a àn dut il savôr popolâr, di deventâ intune cierte maniere popolârs. Baste pensâ al repertori di Zardini, par nomenânt un». Di un lavôr interessant publicât di Sergio Piovesan dal Coro Marmolada di Vignesie, che al met a racuelte une biele serie di cjants e di vilotis furlanis par corâl, di dôs a cuatri vôs, e daûr di altris ricercjis dal stes Straulino, il nestri musicist e compositôr al da a chestis poesiis musicadis tra Vot e Nûfcent, une vieste autorâl sclete e cjantarine, tai sunôrs di une vôs e di une ghitare.
◆ «O ai pensât che la melodie e la armonie di chescj cjants par côr, inte lôr essence, a deventin une vôs uniche, cjapant il teme di ogni cjant. Sore o ai tramade une armonie cu lis sîs cuardis che dispès e cjale bande l’antîc, o l’etnic, de nestre tradizion, a ûs di un cjantôr di strade. Si presentin cussì intune vieste divierse e cuntune leture che di solit no si sint». Oparis tant che “Oh cjampanis de sabide sere” di Nimis, Loi e Garzoni, “La mode” di Deperis e Escher, “Une volte tu jeris biele” simpri di Escher, “I doi pôi” di Cadel e Conti, “Anìn varìn fortune” di Fruch e Escher, “Il cjant dal forment” di Fruch e Garzoni, tra cjants cognossûts e altris mancul o par nuie, si puedin viodi e scoltâ su la pagjine Facebook di Lino Straulino, che lis interprete te sô maniere biele, sclete, gjenuine, sincire e apassionante. «In Friûl o vin musiche biele, bielonone, e o soi sigûr che a ’nd è tante inmò che no cognossìn, parcè che al mancje un lavôr seri di ricercje tai archivis, intes cjasis, dapardut indulà che si pues cjatâ spartîts, magari mai publicâts o dismenteâts masse adore. Di Tita Marzuttini, par esempli, tu cjatis pôcs tocs ma a ‘nt veve scrits centenârs. E nol è il sôl che al larès riscuviert. Garzoni, Conti, Seghizzi, anonims come chel di Cjaudistrie, ma o sin te prime metât dal Sietcent in chest câs, che al à scrit “Jo vuei fâ une cjançonete”. Une melodie cetant biele, come altris dôs cjantis antighis, lis unichis che si cognossin, secont me, pal moment: “Gjoldìn gjoldìn” di Lazaro Valvasensi dal 1634 e “Povere ce farajo” di Luigi Pozzi dal 1650. Al è facil imagjinâ che tantis cjançons dal Colloredo a fossin musicadis in manieris similis. Mi auguri di cjatâ altre musiche dal periodi e, finide cheste storie pandemiche, o speri di dedicâ inmò timp ae ricercje». Curiôs simpri Lino, che tra indagjins musicâls sui patrimonis di tradizion e di autôr e sôs creazions di cjantautôr cognossût e stimât, no dome in Friûl ma in variis bandis de Europe e des Americhis, nol sta mai fer. E, di fat, pôc prime de crisi che nus à obleâts a stâ ducj sierâts dentri, al veve publicât pe etichete Nota di Valter Colle, l’album “Villandorme”, insiemi cul ghitarist Alvise Nodale e cu la cjantante Alessia Valle. «Chest progjet, fat insiemi a dôi brâfs zovins, al è leât aes mês esplorazions su la musiche tradizionâl, e di tant timp o vevi la idee di tirâ sù un tercet acustic di ispirazion folk band inglese dai agns Sessante e Setante. La sielte dai tocs e il lavôr di elaborazion creative su rangjaments e melodiis al è stât tant che la continuazion di un altri progjet tacât dal 2004: “La bella che dormiva”». Siet tocs, par un viaç tra presint, passât e futûr, par cjants in forme gnove come “La fia del paesan”, “La bella brunetta”, “L’uccellin del bosco”, baladis come “Cecilia, “Il mugnaio”, “Donna lombarda” e “L’inglesina”. ❚
