Un studi american publicât de riviste Quarty al à mostrât che intal 2017 ben l’11,7% dai americans al veve declarât di vê let poesiis intai ultins 12 mês cuintri il 6,7% dal 2012. Chei che le lein di plui a son i fantats tra i 18 e i 24 agns: intal 2017 il 17,5% al à dit di lei poesiis, a pet dal 8,2% dal 2012.
La cause di cheste incressite? La publicazion di poesie sui social network. In particolâr su Instagram. La esplosion di cheste app e je stade calcolade dispès tant che muart des peraulis, a benefici des imagjins: invezit propit li la poesie e à menât butui gnûfs.
La figure emblematiche dal moviment dai “instapoets” e je Rupi Kaur, 26 agns, une fantate canadese di origjin indiane cun 3,7 milions di followers.
Daûr di cheste tindince, su Instragram si pues cjatâ un “instapoete” che al scrîf par furlan cun buine cualitât. Federico Scarpin, 21 agns, al è di Flumisel. Student, dopo vê fat il liceu linguistic al studie ae facoltât di tradutôrs e interpretis a Triest.
__
Fidrì, cemût âstu tacât a fâ poesie e cemût mai su Instagram?
O ai simpri scrit tant fin di piçul, ancje par furlan. No vevi mai publicât nuie, e Instagram le ai viodude tant che ocasion par esprimimi. O vevi sintût fevelâ dai instapoets e chest mi à fate vignî la idee di vê cheste pussibilitât.
__
Cuant âstu tacât a publicâ?
O ai tacât chest Istât e al è stât par câs: o ai publicât une poesie pal aniversari dai miei gjenitôrs che e à vût cussì tant sucès che o ‘nd ai publicade une altre, e daspò chê seguitive, e vie cussì. Dopo lis primis, tancj amîs mi àn sburtât a meti ancjemò altris. Soredut chês par furlan: tancj amîs che no lu fevelin mi àn domandât di metilis par vie che ur plaseve di lei alc te nestre lenghe.
__
Tu scrivis in grafie standard corete, dulà âstu imparât?
Come che ti disevi, ancje di piçul lu scrivevi, ma come che mi vignive, di base in grafie taliane e metint i acents un tic a câs (al rît, ndr). Po dopo, a scuele, in gracie di une insegnante o vin fat alc par furlan. Jo in famee o feveli chel di Flumisel, ma par scrivi o dopi il standard ancje parcè che ti da une base sistemiche sigure in gracie dai vocabolaris che a son. Jo o dopri massime chel on line che al è sul sît de ARLeF.
__
Lis poesiis lis scrivistu al computer?
A dî la veretât jo o dopri tant la cjarte: o soi plen di sfueis e sfeuts dulà che o scrîf cuant che mi ven alc. Ancje daûr di biliets dal autobus, par dî. Par publicâ o dopri une app, ancje par dâi un biel aspiet grafic. Lu ai sielzût minimâl, in blanc e neri: al somee il sfuei di un libri.
__
Cemût ti ise vignude la passion pe poesie e pal furlan leterari?
Propit leint poesie par furlan, di Cappello e Pasolini. Cun lôr o podevi lei robis che e van di là des solitis robis tradizionâls. Mi plasin tant ancje i lavôrs di Novella Cantarutti. In prose invezit il prin libri che o ai let, cjatât te librarie di cjase, al è stât «Tiaris di Aquilee»: une racuelte di mîts e liendis dal Friûl di mieç. Po dopo o ai let «Chei di Murae» di Pieri Menis e «Prime di sere» di Sgorlon.
__
E je stade calchi polemiche sui “instapoets”, acusâts di superficialitât e di contâ plui su la imagjin che su la cualitât poetiche…
Plui che pe prevalence de imagjin, lis polemichis a son stadis su la cualitât de scriture. In Americhe critichis par vie dai erôrs, adiriture di gramatiche, che i instapoets a fasin. Jo o pensi che chest al sedi inevitabil: se la publicazion e je vierte a ducj, al è clâr che ducj a scrivin, ognidun cemût che al sa. Podopo però la cualitât e ven fûr.
Jo o viôt l’aspiet positîf: Instagram si è mostrât un strument potent pe poesie, une robe che no si varès mai dite par un social fondât pes fotos. E o ai di dî che al è propit cussì: jo o ai fat ancje cualchi esperiment su Facebook, ma il bon acet vût su Instagram nol è nancje di meti.
__
Di resint sul to profîl tu âs tacât a meti ancje materiâl che al fâs part di une racuelte clamade «Lidrîs». Di ce si tratial?
In chel câs a son une serie di contis curtis-curtis che a fasin part di une storie di famee. E scomence cu la tornade a cjase di un veteran de Grande Vuere intun teritori che le à vivude sot bandieris diviersis. Un gnûf esperiment.
__
Une serie di “instacontis”, si podarès dî…
Ah! Ah! Vere! Lancìn il tiermin, alore. Mandi, si viodìn su Instagram. ❚
Dree Venier