FANTATS E FUTÛR. Cambiâ dispès lavôr nol è une condane, ma une ocasion

Di pôc, o ai scomençât lavôrs gnûfs. Chê di cambiâ dispès lavôr e je une robe che in chest moment mi va un grum, parcè che mi da la pussibilitât di scuvierzi situazions e personis gnovis. Cun di plui, fasint cussì, mi met a imparâ cun impegn robis interessantis e impuartantis ogni dì, cjapant sù simpri la sfide e butantmi intes situazions plui inspietadis.
◆ Ancje par chestis resons, jo no soi tant dacuardi cu la corint di pinsîr di lâ a scuele, po dopo ae Universitât e po dopo ancjemò a cjatâ il lavôr de vite. Jo, pues stâi che al sedi par vie dal otimisim dai mei 20 agns, o crôt di plui aes esperiencis che no ai studis. No tant parcè che lis esperiencis diretis ti dedin plui competencis o cognossincis rispiet al studiâ suntun libri, ma plui che altri parcè che, fasint esperience e, magari, viazant, si scuvierzin personis, mûts di vivi e ponts di viste gnûfs che prime nus jeris scognossûts.
◆ Restant inte zone de comoditât, evitant di fâ un pas di plui par pôre di ce che no si à ancjemò scuviert, si piert tant. Prime di dut si piert la pussibilitât di meti ae prove se stes e di viodi fin dulà che si pues rivâ, e po dopo si riscje ancje di fossilizâsi su lis propriis opinions cence vê scoltât chês di chei altris.
◆ O ai scomençât l’articul cul dî che cumò o stoi fasint doi lavôrs gnûfs: un a Udin e un inte ex provincie di Gurize. E ben, za cussì o disarès che al è pussibil viodi lis limitazions di dutis chês personis che inte lôr vite no si son mai spostadis de zone de comoditât: cun tant che si è di fat dongje e che la tiere e je plui o mancul la stesse, a esistin dut câs suspiets, difidencis e seticisims, sedi di une bande che di chê altre. La stesse robe e sucêt su scjale plui largje, cuant che si fevele adiriture di altris paîs: che a sedin asiatics, americans, africans, europeans o oceanics, la difidence, magari cussì no, e je simpri presinte.
◆ Cirint di jessi il plui pussibil ogjetive e duncje tirantmi fûr al massim di chestis situazion, mi rint cont che jessi tant dividûts pûr jessint cussì dongje al è un pecjât e une straçarie: par cuâl motîf pierdisi intes diferencis, invezit che metisi insiemi par dutis lis robis che si àn in comun? ❚