Emiliano Maroncelli, il zîr de Cjargne in 300 bôçs

O sin lâts tal Comun di Cjavaç par fâ une cjacarade cul apicultôr Emiliano Maroncelli che tal 2012 al à viert la sô aziende agricule. Nus conte che “la passion pes âfs e jere nassude za prin, tal 2002. Cul passâ dal timp o ai let libris, fat cors e prime di vierzi la ativitât o ai ancje fat un tirocini a Verzegnis, li dai fradis Marzona. Cui miei apiaris o preferìs stâ te zone montane e culinâr dal Friûl, mi soi sbassât massime ae zone di Udin. Di doi agns o puarti lis âfs ancje a cuote alte. Dal an passât o soi jentrât a fâ part dal presidi de mîl di mont alpine alte Slow Food: il presidi al cîr di valorizâ e rilançâ la mîl di mont alpine sore i 1400 metris. Cui miei apiaris o rivi a cuvierzi i cjanâi di Aupe, Pontebe, Resie e Dean”.
◆ Nol è un mistîr facil: “In cheste ativitât no si cjale mai l’orloi. Purtrop a son un pôcs di agns che la produzion no va benon par cause dal timp stramp. Chest an al è stât il piês di ducj parcè che il timp al à condizionât in maniere impuartante la produzion: o ai scugnût alimentâ lis âfs che nus àn prodot la mîl, e al è stât un vêr disastri. Il lavôr dal apicultôr al è impegnatîf soredut par me che o soi di bessôl e che o scuen gjestî la ativitât dal apiari, dal laboratori e de vendite dai prodots. Cu la anade juste o rivi a produsi plui varietâts di mîl: mont alte, agace, tei, cjastinâr e “la mîl des 4 valadis”: aiar, cjariesâr e tale. Il grues dal lavôr al è concentrât dal mês di Març a Avost/Setembar. Vie pal Invier di solit si fâs un control e si da di mangjâ aes âfs. La robe miôr e sarès che l’Invier al fos frêt, cussì lôr a stan dentri e no si consumin. Se l’Invier al è clip lis âfs a jessin e lant ator si consumin”. In dut, al conte, “o ai cirche 300 bôçs (tancj ju dopri par rinfuarçâ lis fameis plui debilis). Il prodot si lu cjate in cualchi buteghe de zone cjargnele ma o procuri ancje di puartâlu a domicili su domande e lu vent in cierts marcjâts”.
◆ Cun di plui Emiliano al fâs ancje servizi di disinfestazion dai calavrons e des jespis. E je ancje interessante la part didatiche: Emiliano al crôt che al sedi impuartant fâur cognossi il mont des âfs ai fruts e cussì tor Avrîl/Mai al organize progjets in colaborazion cu lis scuelis de infanzie e primariis de zone: “Mi da un grum di sodisfazion lavorâ cui fruts. A son come sponzis e a cjapin sù dut! I fruts des scuelutis a son chei plui ricetîfs ancje parcè che i miei progjets a son une vore pratics: ur fâs viodi e tocjâ la cere, ur fâs viodi lis diferencis che a son fra âfs e jespis, tocjâ i celets, sintî il cjant de regjine, cerçâ la mîl dopo vêle fate tirâ jù dai telarins e i fruts a son atirâts di dutis chestis robis. Al è un lavôr impegnatîf ma o crôt che al sedi une vore impuartant rivâ ai fruts”.
◆ Par altris informazions e par inzornaments si pues viodi la pagjine Facebook: https://www.facebook.com/profile.php?id=100054607202720. ❚