La diocesi “autonome” di Vençon

Ai timps dai arcivescui Alfredo Battisti (1972-2000) e Pietro Brollo (2000-2009), cualchidun al sostignive che i predis di Glesie Furlane no apartignivin ae arcidiocesi di Udin ma ae diocesi di Vençon. E no vevin ducj i tuarts.
◆ Il motîf al è sempliç: Vençon al jere la sede dai nestris incuintris, cul so domo consacrât dal patriarcje Beltram ai 2 di Avost dal 1338 e in posizion centrâl fra la Cjargne e la Basse. In plui al rezeve la plevanie, e le rêç, bons. Roberto Bertòs: simpri splendit tal vierzinus cûr e puartis.
◆ Il grup di GF al començave a cjatâsi in Setembar cuntune corierade di int che e partive par cualchi lûc simbul de storie di Aquilee; dopo, e vignive fate une zornade par meti adun il program dal an. Come lûc si sielzeve un stali a Riu Vert dongje di For Disot, o une canoniche di cualchi altre bande. Di Otubar a Lui al jere il vêr an pastorâl: si cjatavisi une domenie par mês di dopodimisdì a Vençon par rifleti e discuti sul argoment dal an. Si cirivin relatôrs competents cence cjalâ se a jerin catolics o no. La lôr professionalitât nus bastave. La partecipazion e jere buine: in medie 60 – 80 di lôr. I ats a vignivin publicâts. Mi plâs ricuardâ: La pastorâl dai paîs piçui (an 1988), Bibie libri di Diu libri de int (1989), La tiere e je di Diu e nô o sin fituâi (1990), O jeri puar e o vês viodût di me (1991), Famee: mito o vocazion? (1992), Vite e Bibie (1994), Diaspore (1995).
◆ I nestris incuintris a finivin par solit tal Cafè Vecjo, li che une cuindisine di nô si fermave par cene. Si sierave tor undis di gnot cjantant vilotis e cjants di glesie miscliçâts, ma dut in maniere une vore corete par vie che sul cjant cun pre ‘Sef no si sgarave. I vescui a vignivin visâts par ogni incuintri ma a rispuindevin che di domenie dopodimisdì a jerin cjamâts di lavôr. Però mai une volte in tancj agns nus àn proponût: “Fasìn un incuintri vie pe setemane”. La Vite Catoliche e publicave l’avîs tun cjantonut o tal spazi di un bol, ma lu meteve.
◆ Fra i tancj incuintris, o puarti ancjemò la sodisfazion de Letare scrite al pape Zuan Pauli II pal ricognossiment des lenghis di culì te liturgjie in ocasion dal so viaç in Friûl tal 1992. E jere compagnade di 13.000 firmis; le veve dade dongje un biel trop di int e le vin studiade e metude jù insiemi peraule dopo peraule. Mi è restade intal cûr ancje la “Semblee dai predis dade dongje dal Grop, Udin, Seminari 2-3 di Setembar 1985”. A àn partecipât cuasi une cuarantine di predis dal centri e de perifarie: une robonone!
◆ Il nestri an liturgjic al veve come fonde e culmin la messe pe solenitât dai sants Macôr e Fortunât, te basiliche mari di Aquilee te domenie dopo dai 12 di Lui. Altris fiestis che si partecipave: la prime domenie di Avost pe sagre dal patriarcje Berltram a Vençon, o ancje la messe de vee de Sunte in Guart o il prin di Mai a Resie. Tai incuintris de domenie si cjantave tant vulintîr i Jespui tes melodiis che pre ‘Sef al veve parecjât. Ogni an dopo Pasche o fasevin une rogazion te campagne sot il patrocini di pre Renzo Dentesan. Di chei agns però o sint ancjemò la emozion de celebrazion a Grîs, te Capele Sistine dal Friûl, in ocasion de presentazion dal completament de grande opare de Bibie (an 1993). Liturgjiis che a jemplavin anime, cûr e vite.
◆ Dut al vignive fat cun determinazion e cence pôre. Par noaltris, culture popolâr, la difese de int, valorizazion dal popul e de identitât furlane, une glesie locâl incjarnade in cheste tiere… a jerin il pan cuotidian e o metevin za in pratiche in chei timps lis peraulis che pape Francesc al à proferît a Dili, capitâl dal Timor Est, ai 10 di Setembar di chest an: “Mi hanno detto che su alcune spiagge arrivano i coccodrilli. Essi hanno un morso molto forte. Attenti ai – coccodrilli – che vogliono mordervi cambiandovi la storia e la cultura. Tenetevi lontani da essi, perché mordono molto”. Peraulis sacrisantis ancje pal Friûl. E tune altre omelie, simpri ai zovins, il pape al à dit: “Fate chiasso, perché il vostro chiasso è il frutto dei vostri sogni”. Noaltris, in chei timps, o jerin chê zoventût li. Vescui, curie di Udin e GF: scuintris e incuintris, polemiche e dialic, gloti e berlâ a jerin a puartade di man; merits e fai a son stâts di dutis dôs lis bandis. Il timp al passe e ancje lis buliduris si smamissin; o pensi però che un pecjât al resti e che al fasi ombre tal nestri sisteme gleseastic: il vê proibide di agnorums incà la lenghe mari te liturgjie, te messe, tal messâl, tai sacraments, tai salms, tai marums dai puars, te Liturgjie des Oris. Chel, pal cristian, al è il lûc specific e privilegjât de cussientizazion, formazion e maturazion di popul di Diu. Il rest a son curis ancje bielis ma paliativis e si viodin i risultâts. Il Signôr perdonaraial chest tradiment, delit cussì penç? Cumò ducj a cjacarin dal Ius soli e Ius scholae e ancje in Friûl si començarà a meti di dirit te scuele lis lenghis hindi e afar. Intant o lassìn murî il nestri furlan, sloven, todesc! Cetant incocalîts e puars che o sin! “Vuardaitsi dai crocodîi! Fasêt scjas e davoi!” nus berle pape Francesc. ❚