Elezions regjonâls pal 2018: plui candidâts che eletôrs

Simpri mancul eletôrs, simpri plui candidâts: no mancjaran i elements di interès intal troi che nus menarà aes elezions regjonâls 2018, che si davuelzaran cun dute probabilitât adun cu lis politichis. Al è stimât di tancj che la presidente de Regjon Debora Serracchiani no si candidarà di gnûf pe sô cjadree ma e svolarà a Rome in Parlament. Par fâlu e podarès sielzi di dimetisi par meti adun politichis e regjonâls, cul obietîf di sparagnâ e forsit ancje di fâ cressi i consens al so partît, il Pd.
Il centriçampe vuarfin de Serracchiani al varès di pontâ su Sergio Bolzonello, vicepresident in continuitât cu la azion puartade indevant di cheste zonte.
A sfidâlu pal centridrete al varès di jessi Riccardo Riccardi, ma il cjâfgrup di Forza Italia al varà di convinci chei altris che si declarin interessâts a cuntindi la presidence a Bolzonello: prin di dut Renzo Tondo, za dôs voltis president, e po Massimiliano Fedriga che al reclame plui pês pe Leghe. I ben informâts a disin dut câs che ducj i doi a varessin plui voie di lâ a Rome che a Triest.
No son ancjemò gnovis invezit des bandis dai 5 Stelis: i grilins a sielzaran come simpri online i lôr candidâts, ma nol è dât savê cui che si proponarà ai iscrits dal Moviment, che dut câs in Friûl nol à vût aes aministrativis grancj risultâts.
Cheste e je la situazion dai partîts taliâns: ma altris candidaturis a podaressin nassi cu la formazion di une cussience autonomiste. Il prin che al à fat capî di jessi disponibil a fâ sintesi al è stât Sergio Cecotti. Cumò e je rivade a sorprese ancje la candidature pai Verts di Alessandra Guerra: starìn a viodi se la sô e je une “boutade” o une intenzion serie di costruî une alternative politiche serie. Al sarès un pecjât dut câs dividi il front di chei che a varessin di meti dongje ducj che no vuelin plui vê a ce fâ cui partîts talians che tai ultins dîs agns a àn disvuedade la nestre autonomie, e tra i prossims a podaressin gjavânus ancje la nestre specialitât.
✒ Walter Tomada