Catalogne: isal un vêr referendum pe indipendence?

La situazion catalane e je plui ingredeade di ce che al pues someâ: masse sempliç, e falât, viodi te clamade al referendum dal 1 di Otubar (cu la domande «Vuelistu che la Catalogne e sedi un stât indipendent in forme di republiche?»), il risultât di un percors indipendentist coerent.
O sin lontans dal câs scozês, là che tai ultins agns si à viodût une incressite sedi de autonomie de Scozie, sedi des sôs prospetivis di otignî la indipendence cuntun referendum acetât di Londre.
Dut al contrari in Catalogne il referendum al rive tant che risultât di une crisi grivie de autonomie e, magari cussì no, di zûcs di oportunisim.
Dopo finîts i timps di Jordi Pujol, autonomist conservadôr, president de Generalitat de Catalunya dal 1980 al 2003, la politiche catalane e je lade in piês: a son mancjadis figuris di nivel pareli di chês de fase prime (che in dut câs no vevin lis mans tant netis…); lis speculazions esagjeradis, fatis za sot Pujol cemût che al sucedeve in dute Spagne, a àn causât une crisi imobiliâr che si è zontade cu la crisi finanziarie mondiâl; il neocentralisim spagnûl, reazion ae crisi economiche e politiche, al à indebilît la autonomie catalane.
Al contrari di ce che al è sucedût tal Paîs Basc, i politics catalans no son stâts bogns di difindi i interès de lôr comunitât: il pivot dal confront cun Madrid al è passât in curt dal discors di incressi la dotazion finanziarie e lis competencis a chel de autodeterminazion e de indipendence, ma cuntune societât là che chei che si declarin indipendentiscj a son jenfri un 20% e un 30%! Une presince impuartante, ma pardabon masse basse par vê prospetive concrete.
Cun dut achel la conzunture e à fat che si inviassin dinamichis complessis:
– la mobilitazion dai indipendentiscj autentics, che a àn vût la impression (o ilusion?) di cjatâ plui politics pronts a meti in vore i lôr ideâi;
– la tatiche solite di domandâ 100 (la indipendence) par vê 10 (plui autonomie);
– la strategjie dal teatrin jenfri politics, sedi spagnûi che catalans, che no son bogns di frontâ i problemis sociâi (sedi a Madrid che a Barcelone a son guviers debii), ma che a àn interès di mantignî la tension su la indipendence: chei spagnûi a fasin biele figure a mostrâsi difensôrs de Spagne, chei catalans a puedin dâ la colpe di ducj i mâi a Madrid.
Si zonte une ambiguitât di fonde: i catalaniscj a declarin di volê rivâ ae indipendence tune suaze di legalitât, ma il dirit spagnûl nol previôt in nissune maniere di concedi la indipendence di un teritori cuntun referendum legâl e ricognossût.
Un auguri al è che si rivi in curt a fevelâ di ce che al è pardabon un probleme european: disfâ i stâts nazionâi (e no fâ un altri stât nazionâl, ancje se catalan), che a fasin dome dams, e dâ lis competencis che ur restin un pocjis ai teritoris autonoms e un pocjis a istituzions europeanis democratichis.
Po stâi che su chest cantin, par une volte, al sarà il Friûl a insegnâ alc ae Catalogne, magari tacant cu lis elezions regjonâls dal 2018.
✒ Sandri Carrozzo