Sfuei Mensîl Furlan Indipendent
Archivi de Patrie

Elezions in Scozie: cussì il vôt

ensoul.admin

Il 3 di Mai si son tignudis in Scozie lis tiercis elezions pal Parlament creât tal an 1999. Tal stes dì a son stadis ancje lis elezions locâi.

Argoment pui discutût vie pe campagne eletorâl: plui autonomie pal parlament locâl, ma ancje salût, educazion, riforme dal sisteme tributari, e la vuere in Irak.

Il risultât di cheste tornade eletorâl al à viodût un cambiament significatîf tal senari politic scozês: il partît nazionalist (clamât par inglês Scottish National Party e par gaelic Pàrtaidh Nàiseanta na h-Alba) al à vuadagnât 47 seçs su 129, un seç in plui di chei vinçûts dal partît laburist che pe prime volte in 50 agns al à pierdût la maiorance. 17 seçs a son lâts ai conservadôrs, partît vuidât di David Cameron, 16 ai liberâi democratics, 2 ai verts e un ae indipendente Margo MacDonald. Il partît socialist scozês (Scottish Socialist Party) e il Scottish Senior Citizens Unity Party (une specie di partît dai pensionâts), che a vevin vuadagnât seçs tes elezions dal 2003 e il gnûf partît Solidarity (fondât tal 2006 dal socialist Tommy Sheridan) a àn pierdût ducj i sîs seçs in chestis elezions.

Alex Salmond, leader dal Scottish National Party, al à declarât “La Scozie e je cambiade, in miôr e par simpri”.

Il 16 di Mai Salmond al e stât nomenât gnûf prin ministri de Scozie, daûr dal risultât eletorâl: di fat, l’esecutîf scozês al è nomenât in mût diret dal Parlament e al va daûr de maiorance parlamentâr. In chest câs però si trate di un guvier di minorance, parcè che il partît di Salmond nol à une maiorance indipendente e al varà duncje bisugne di une coalizion plui largje par podê governâ. Salmond tal stes timp al e stât elezût prin ministri in gracie di un acuardi di cooperazion, firmât cun doi parlamentârs dai Verts. La sielte di une coalizion plui largje e varès di colâ sul partît liberâl democratic, ma fin cumò no si è rivâts a un acuardi par vie di une divergjence di opinions che e viôt i liberâi democratics contraris a un dai principis fondamentâi che a son ae fonde de vitorie dal Scottish National Party: promovi jenfri il 2010 un referendum su la indipendence de Scozie dal Ream Unît e tornâ a une situazion aministrative come che che e jere prime dal 1707, an de firme dal Act of Union, che al veve unît il ream di Scozie cun chel de Ingletiere, sot de corone inglese.

Il partît di Salmond al à a vuê cinc ministeris tal esecutîf: finance, salût, educazion, justizie e ambient.

Il Scottish National Party, fondât tal 1934, al è stât fin dal 1999, an de devolution, il principâl opositôr politic de coalizion tra il partît laburist e chel liberâl democratic. La base politiche dal partît e je part di un contest sociâl democratic di stamp european, cun principis di base che a smirin al disarmi nucleâr, ae tassazion progressive, ae ridistribuzion de ricjece tra lis classis sociâls, ae educazion di base gratuite par ducj, ae lote ae puaretât e a une posizion contrarie ae NATO. Ma soredut si fonde sul impegn a fâ deventâ la Scozie un stât indipendent tal contest de Union Europeane e dal Commonwealth of Nations (la associazion formade di 53 ex coloniis inglesis).

 

Chiara Segrado

––––––––––––––––––––––––––––––––––––––––––

La storie de gnove indipendence scozese

Tal lontan 1707, la Scozie e jere un stât indipendent, che al fo unît ae Gran Bretagne in gracie di un tratât clamât Act of Union e par 300 agns, fin ai nestris dîs, e je stade part dal Ream Unît. Chest nol à dal sigûr flapît la identitât scozese: la lenghe e lis tradizions a son vivudis tai secui, cussì come il kilt, la cotule doprade dai oms, il tiessût di tartan e il sun de cuarnamuse. Ta chei agns al semeave prevalê in Scozie un moviment unionist, supuartât di grancj scritôrs come Sir Walter Scott, autôr di un dai plui grancj romançs de storie de leterature inglese, Ivanhoe. Ma te metât dal 1800 a scomençarin a vignî fûr moviments a favôr de autonomie come l’Home Rule, ancje se i rûts moviments indipendentiscj a forin dismenteâts fin al 1920. La idee autonomiste, supuartade dal partît conservadôr e di chel liberâl, elaborade fin dal 1853 e presentade al parlament di Westminster tal 1913, e fo lassade colâ par vie che e tacà la Grande Vuere. Dome tal 1974, il partît scozês al à scomençât a vê pui seçs (e duncje podê) tal parlament inglês, e al puartà indenant cui plui fuarce lis ideis indipendentistis. Tal 1997, il 75% dai Scozês al a sielzût la vie de devolution par mieç di un referendum, e midiant il Scotland Act il guvier di Londre al à di fat creât il parlament scozês, cun podê decisionâl cuasi totâl su lis cuestions domestichis. Lis primis elezions dal parlament scozês a son stadis tal 1999, pe prime volte dopo dal lontan 1707. Donald Dewar al fo elezût tal 1999 prin ministri pe coalizion laburiste e liberâl democratiche, intant che il partît nazionâl scozês al deventave il prin partît di oposizion. Par tancj di lôr, chest al jere il prin pas viers la rivendicazion de autonomie e la indipendence de Scozie. Un moviment, chel che al smire ae autonomie scozese, che al à mobilitât ancje un non cognossût tant che chel di Sean Connery, atôr famôs in dut in mont pe sô interpretazion di 007, nomenât “Sir” di bande de regjine Elisabete. Connery si è di fat presentât ae inaugurazion dal canâl televisîf dal Scottish National Party, un canâl che al trasmetarà vie Internet. “Insieme o podìn vierzi la puarte a un gnûf periodi di otimisim e di progrès par ducj” al a declarât Connery; “Il Scottish National Party al è il partît de Scozie e al à lis ideis justis par meti in vore cambiaments positîfs pe Scozie”. Chê che par 300 agns e je semeade une ideologjie lontane dal jessi concrete, cu lis elezions dal Mai passât si dimostre simpri di plui une realtât a puartade di man.

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +