La convenzion cuadri pal eletrodot Udin-Redipulie, sotscrite in Otubar, e siere in maniere formâl un iter lunc e plen di interogatîfs sot segn. “Cosa fatta capo ha”, al sugjerirès un antîc adasi consolatori, just par chei che si rindin in maniere lemite ae evidence, magari par razionalitât, se no propit par convinzion. Evidence e razionalitât no rapresentin in ogni câs i ingredients principâi di cheste vicende, plene di erôrs e di berdeis pronts a duplicâsi, a riproponisi par altris ocasions futuris (ma no masse). Come intal câs dal progjet di eletrodot Okroglo-Udin, che al somee candidâsi a semenâ di pilons piramidâi o monoaste lis bielis vals dal Nadison.
O cuvierç la incarghe sindicâl atuâl dal 1999 e o pues testemoneâ, cence pôre di jessi contradit, che mai nissun di chei che a àn firmade la convenzion cuadri si è sumiât di cjapâ dentri su la cuistion i sindicâts teritoriâi furlans, salf comunicazions strentis e sieltis riferidis za adotadis. A cjapânus dentri pe prime volte a son stâts i sindics dai comuns coinvolts dal percors, la Vierte passade, par viodi se o savessin alc di plui dai “ipse dixit”. Il timp di racuei informazions e coordenadis, e Lodovico Sonego, ex assessôr de Zonte Illy, al ven incuintri su la stampe e cun ande democratiche al aferme: “…I puescj di vore a calin, i disocupâts a cressin… cui che nol sosten l’eletrodot Redipulie-Udin Ovest al rapresentarà in maniere esplicite il partît de disocupazion”. Fin masse clâr. La CGIL teritoriâl si convinç. La UIL e la CISL teritoriâls no, valutant che lis robis che no levin, chês ignoradis, a jerin dut altri che trascurabilis. La prime, relative al respîr partecipatîf reâl aes sieltis impuartantis, a ’nd jessive fûr, come motivât, une vore malmetude. La seconde, leade ae valence strategjiche suponude di cheste opare pal Friûl, e riproponeve in clâf plui moderne une antighe feride: chê des servitûts che o vin paididis nô, par interès di caratar ben plui ampli.
Che l’eletrodot Redipulie-Udin Ovest si fasi par meti in sigurece lis dibisugnis energjetichis de nestre “piçule Patrie”, al contente i adolessents e i pûrs di spirt. La opare e à valôr assolût par Terna, pal so progjet di sorestanzie europeane, pe rêt di conessions che e permetarès di colegâ l’Est – produtôr di energjie – cul rest de Comunitât, che la energje le domande. L’ex President Tondo, in mût dut altri che scuindût, in ocasion di un incuintri regjonâl su la ABS, al à confermât di jessi lât in Slovenie par “fâ businness nucleâr”. Dopo ben doi referendum nazionâi, la Italie i zire intor ai ostacui, no dome lant a cjapâ energjie eletriche prodote dal nucleâr, ma prometint ae Slovenie e ae Slovachie che i bêçs par rinovâ i lôr implants viei e pericolôs ur ai darìn nô, in maniere direte o indirete. Parcè no fevelâ di chestis robis? Parcè afermâ che cul eletrodot o sparagnarìn, dal moment che Terna e precise in maniere corete: “l’eletrodot, aeri o intierât, lu paiarês purpûr voaltris, cu la bolete”. Plui di cent pilons alts 80 metris (tant che e je la distance tra la base di Place Prin di Mai e la ponte dal agnul dal Cjistiel) a passaran il nestri teritori intune des sôs fassis plui verdis e fertilis. Si sosten che l’impat ambientâl al sarà contignût. In dute Europe si è daûr a pensâ e a operâ daûr schemis che a fasin de bielece paisagjistiche, dal atrat estetic e funzionâl dal teritori un valôr zontât, fale che di nô. Par chest, nus savolte la afermazion lunâr dal Assessôr regjonâl al ambient e ae energjie Sara Vito: “Eletrodot intierât? No si ‘nt fevele gran!” In Piemont, assessôr, Terna e à inviât, pal toc in teritori talian, un eletrodot intierât, lunc no 40, ma 110 chilometris, e cence grancj intops. In Piemont si ‘nd è fevelât, forsit parcè che li no tegnin tant a jessi sotans, a dî simpri di sì al podê. No sta sù propit la tesi che i presits de soluzion intierade (che UIL e CISL teritoriâls in maniere esplicite a poin, sostignint che al è oportun lâ daûr dal percors de autostrade A4) a fasaressin jevâ i coscj tant che un paneton, viodût che i francês (in plui che i piemontês) no amin propit butâ i lôr bêçs dal barcon. Parcè alore une ande cussì spreçante e cussì tante mafie? I smus problematics e relazionâi, la scurtadure e duncje la afidabilitât des liniis decisionâls, o capìn (magari cussì no) trop che i fasin comut a Terna, che la sô capacitât di sbeleâ e je parude tant clare in Provincie ai 3 di Otubar stâts, dilunc di une iniziative publiche che e à volût proponi un metodi, cuasi ignorât, di ben altri tenôr, sociâl e tecnic.
Come la Italie, la nestre Regjon no dispon di un program energjetic. Come la Italie, la nestre Regjon no dispon di politichis industriâls buinis di prefigurâ un model di disvilup che nus disi ce che o sarìn tra dîs, vincj agns; ce che al sarà il Friûl e di ce che al vivarà, viodude la crisi dal manifaturîr e i sintoms di une deindustrializazion palese. L’eletrodot, nassût cun Illy, gjestît di Tondo e definît di Serrachiani, al à delineât un pentagram preocupant, dulà che i grups di notis clamâts partecipazion dal bas, consens, dialic, no àn lassât segn su lis riis. Cussì la musiche no pues sunâ ben. Al covente cori ai ripârs. Il timp al è, no si pues espropriâlu, al è di une comunitât piçule, ma fuarte, e braurose di clamâsi Friûl. ❚
Ferdinando Ceschia
Segretari Gjenerâl Provinciâl UIL di Udin
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +