La rubriche storiche e continue ma cuntune variazion: cemût saressie stade la storie dal Friûl se no fos lade come che invezit e je lade te realtât? Noaltris o provìn a rispuindi cussì…
***
Cemût che e je lade
Probabilmentri, il plui grant patriarcje di Aquilee al fo Marquart, fi di Indrì di Randeck, nassût in Svevie tal 1296 e muart a Udin ai 3 di Zenâr dal 1381, tal mieç di une vuere pardabon internazionâl, che e viodeve la citât di Triest il motîf plui profont de contese. Cuasi une profezie, il fat che l’om plui rapresentatîf de Patrie al sedi mancjât sul plui biel di une cuistion triestine! Studiôs di dirit, si lu cjate a Bologne come student inte universitât plui antighe dal mont: propit li al fo “licentiatus cum facultate docendi”, ven a stâi cul titul di professôr, tal 1322. Si jere trasferît di Padue cualchi an prime, vâl a dî tal 1317, scjampant insiemi cun altris students de nazion todescje par motîfs ancjemò di sclarî, forsit par vie di une barufe nassude par vie di une fantate. Insome, une cuistion di amôr. Amì personâl di Carli IV, lu compagne a Rome, passant pal Friûl tal 1354-1355. Cjapitani militâr e cavalîr di grande abilitât militâr, al vignarà consultât tant che strateghe straordenari in cetantis cuistions che a tignivin impegnade la corone di Praghe no dome vie pe Italie, ma ancje in Gjermanie e in France. Par chest, e par tancj altris motîfs, al sarà propite l’Imperadôr a sostignîlu pe candidature ae catedre aquileiese. Cun chê cjarie, al jentrà in Friûl ai 24 di Dicembar dal 1365. E bielzà ai 23 di Avrîl dal 1366, a pôcs mês dal so insediament, al tache a meti man al document che ducj a cognossin cul non di “Costituzions de Patrie dal Friûl”: une opare grandiose, che nus ufrive, cuntune vore di anticip su tancj popui europeans, une straordenarie cjarte di civiltât e di modernitât, regalant ae Patrie un Parlament e une cjarte costituzionâl. Tant grande e fo chê imprese, che un dai prins libris publicâts a stampe in Friûl, pai caratars de oficine librarie di Gjerart di Fiandre, al sarà propit chel document li, voltât dal latin di un straordenari umanist furlan, Pieri Zocul, tal 1484. No dome la storie de Patrie dal Friûl duncje, ma ancje chê di dute la Europe e sarès stade diferente se un om dal stamp di Marquart nol ves puartât il pastorâl de Glesie furlane.
***
Cemût che e podeve lâ
Padue e sa jessi dolce inte tarde primevere. Il mês di Mai e je dute une rose. Sot dai puartis, i students de Universitât – scuindûts jenfri i lôr tabârs – a fasin la vuaite aes fantatis plui bielis. A ur dedichin cjançons. Poesiis scritis in latin, ma miscliçadis tes lôr lenghis. “Carmina”, les clamin, butadis jù tra une bevude e chê altre, sui bancons di len des tantis ostariis là che al diu dal vin si misclice simpri la biele muse di Venere. Marquart al è rivât di lontan. La Svevie e je tal cûr de Gjermanie. E te sô scarsele, dongje dai libris di dirit, al à un grum di pergamenis cu lis miniaturis dal manuscrit di amôr plui biel dal mont, comissionât nuie mancul che di Rudiger, dai siôrs Manesse di Zuric, amîs personâi dai Randeck: un regâl dal barbe Conrât, siôr di Auguste, canonic ma ancje, daûr di ce che si conte, straordenari cavalîr e amadôr. Vincjeun agns a somein fats par amâ, mighe par studiâ. Il sanc al clucugne tes venis. La muse si impie di fûc. Specialmentri cuant che dal barcon di chê cjase di marcjadants, dongje de borgade là che e vîf la nazion todescje, e cuche la biele musute di Ildegarde, fie di un artesan di Heidelberg. “Plui rosse di une rose, plui blancje di un zi, la plui biele jenfri lis bielis, par simpri mi gloriarai di te”, al cjante sconsolât il fi di Indrì, sunant il so liut, nancje che al fos il plui malinconic dai minnesaenger di Franconie, Baviere, Svevie o Sassonie metûts insiemi! La bionde Ildegarde però e je une man preseade di tancj. Sposâle al volarès dî cjapà sù une dote mighe di pôc! E il pari le à bielzà imprometude a un sorestant di Triest. “Volessial il cîl che une dì cualchidun al podès discjadenâ une vuere cuintri i triestins”, al vai il zovin Marquart, sot de lobie de Universitât. Dome la dì prime, la zingare dal marcjât i veve lete la man: “Destinât a grandis impresis, se tu savarâs dî di no al to cûr!”. Al pense a Paride, chel dal judizi dal miluç: freantsi de glorie de Sapience e de braùre de cariere al veve pûr lui preferide la bielece di Venere… Sì, e je vere, dopo e jere tonade la burascjade di Troie, ma mighe dit che e vadi simpri strucje! E cussì, smorseant un miluç, si cjate sot dal puarton di Ildegarde. E al tache a cjantâ une cjante che i à insegnade un zovin student furlan di Cividât, che al studie di nodâr: “Piruc miò dolc e inculurit”, a disin lis peraulis. E la biele e ven fûr. “E ce vuelino mai dî chestis peraulis, biel zovin che cussì ben tu cjantis?”. Marquart, che al à la lenghe francje, i rispuint di bot: “Se tu vegnis jù, ti conti”. “E gno pari? Ce disaraial gno pari?”, e dîs je galupe. “Bielo dumblo di valôr, cjantarai il vuestri amôr”, al continue lui, come nuie. Insome, la manfrine e va indenant fin cuant che i servidôrs dal pari a jessin rabiôs dal puarton par parâlu vie. Il grup di students todescs che si son fats dongje par gjoldisi la serenade lu pare. A rivin i talians, e i gjendarmis, e intun moment Padue e sclope di une rivolte rabiose. Students cuintri citadins. Al sucedeve dispès. Ma cheste volte, une buine schirie di todescs e ven butade fûr de Universitât, cun disdegn. In tancj di lôr si trasferiran a Bologne, par puartâ indevant i studis di dirit. “Vegnistu ancje tu, Marquart?”, i domandin i amîs. E lui, taponant sot dal tabâr chê biele frute che e veve non Ildegarde: “Lait a disi a chel student di Cividât che il so “piruç” al è stât plui insidiôs dal miluç di Paride. E ae zingare dal marcjât, che cualchi volte sielzi il cûr pluitost che la cariere e je la robe miôr di fâ tal mont”. E cussì, al scjampe vie lontan de citât. Forsit tornant te sô Svevie lontane. Sparint de Storie. Marquart di Randeck, student inamorât. Cuissà mai ce che al varès podût deventâ, lant daûr di chel che e disè la zingare? Un patriarcje magari. O un grant legjislatôr. O dutis dôs lis robis. Ma come che ducj a san, la Storie no si fas cui se… ❚
Angelo Floramo
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +