EDITORIÂL – Une Yalta nostrane

Cuissà parcè, forsit par chê vecje bandiere rosse, ma al funerâl di Baracêt, mi è vignût tal cjâf Stalin e no dome lui. Dongje i stavin altris doi personaçs migo di pôc: Churchill Rooswelt. A jerin ducj i trê a Yalta e cuntune rie a taiavin la Europe cence nissun rispiet par chei popui che la cjarte gjeografiche le vivevin su la lôr piel. O vin vût chi la risultance di chê famose riunion, cu lis cjasis di Gurize cul tinel in Italie e la cjamere di jet in Jugoslavie. Parcè us contio cheste storie? Parcè che mi somee che vuê si sta doprant la stesse logjiche di chê rige sul Friûl e sui furlans. E il lapis nol è in man a int come chei trê, che a vevin vint la vuere e sconfits Hitler e Mussolini, no, e je in man a cualchi omenut dal ministeri di Rome che al decît par esempli che la nestre no je plui une lenghe, ma un dialet. Ma, cence lâ fintramai te capitâl, cualchi omenut ancje a Triest al volarès decidi che Gurize e larà cun Triest e magari Pordenon cun Trevîs.
Ma sino diventâts mats?
Cun ce dirit, cun ce prepotence si movino chescj corvats? In non di cuâl principi, forsit chel dal sparagnâ e de etiche? A son i ultins che a puedin doprâ chei vocabui. E alore ce fasìno di front a un atac che nol à precedents se no tal fassisim e te sô retoriche talianone?
Si à di rispuindi a plui nivei.
ll prin al è chel de cussience che no puedin comprâ un tant al chilo e chi o stin vincint e fuart, ancje: i dâts des fameis furlanis che a àn domandât la lenghe furlane a scuele pai lôr fîs no dome nol cale, ma al è in cressite, massime propit dulà che il tentatîf di division al è plui fuart, ven a stâi a Pordenon e Gurize.
Il secont al è chel de politiche e chi o tornìn a Baracêt e al comitât li che tant si è dât di fâ. La situazion e je grivie se al salte il dificil rapuart cu lis istituzions. Cjapadis une par une sot dal fûc dal centralisim, a colin une daûr a chê altre. La taule dal rispiet dai dirits dal Friûl e va tignude vierte plui che mai, parcè che se e je vere che il popul al fâs la storie, a son lis sôs rapresentancis che a determinin lis condizions plui o mancul favorevulis pe bataie.
Di bessole la glesie furlane e reste spauride de ombrene veneziane e del “triveneto”, di bessôi i sindacâts a patissin la fuarce dal interès centrâl talian, i industriâi, lis categoriis produtivis cence une prospetive di disvilup sul teritori a van a cirî il lôr interès di une altre bande, la universitât cence une sô mission e pense dome a sorevivi. I comuns, lis provinciis furlanis se a pensin dome a mantignî l’aparât e i elets, si cjataran organizâts come che la autoritât romane o triestine e varà decidût.
Che e sedi clare une robe in ogni câs: che i furlaniscj a laran indenant pe lôr strade, parcè che come che al diseve pre Toni e je une cuistion di dignitât. Ma par dâ une man par slargjâ, par meti adun dutis lis fuarcis che a crodin almancul tal dirit dal Friûl di esisti, nissun nol disarà di no. ■
DREE VALCIC