CURIOSITÂT – Sedean, caput mundi

Te plane furlane – a ovest di Udin, in chel cjanton di tiere disegnât sot de statâl che di Udin vie Codroip e puarte di là da la Aghe, e la linie che e mene il Tiliment de Cjargne al mâr – al è poiât in maniere beade il comun di Sedean, une comunitât di 3.926 animis (dât ai 31.12.2010) par une superficie di 50 chilometris cuadrâts, un insieme aministratîf di borcs rurâi (Coder, Grediscje, Grions, Panelie, Ridincic, Rivis, Sant Lurinç, Turide e Sedean) che cun braure si sfuarcin di conservâ la proprie piçule identitât locâl, ancje cuntun cimi di san cjampanilisim, tant di fâ a gare – par esempli –  pe miôr sagre paisane.
Plui di tancj altris paîs de Furlanie, Sedean nol è stât stravolzût di cualchi gruesse concentrazion industriâl o di cualchi frenesie urbanistiche: al à conservât dut il so incjant di insediament rurâl, piturât dal vert dai cjamps e dal tipic ambient di tiere di risultive, di vecjis cjasis colonichis di clap cui grancj portons a volt par jentrâ tal curtîl, e di bielis vilutis unifamiliârs cun zardins curâts, magari tiradis sù cun tante fadie dopo dal taramot.
Un paisaç riposant e paîs cuiets che a fasin pensâ aes tradizions contadinis e ae serene operositât che e caraterize l’anim furlan. E no vignarès mai di insumiâsi che un puest cussì al podès jessi invezit une vere fabriche di talents, di int che – intai cjamps plui diferents – e je partide di Sedean par fâsi onôr ancje ben plui in là dai confins de regjon.
E invezit, di “sedeanots” che a àn savût meretâsi preseament ancje tai cjantons plui lontans dal mont a ‘nd è une vore. Fintremai in Cine, dulà che la plui zovine (par cumò) di chestis “celebritâts made in Sedean” – Eva Molaro, 26 agns, di Coder – si è segnalade par vê tacade une biele cariere tant che preside di une scuele a Pechin. E passâ dai 440 abitants di Coder ai 14 milions de capitâl cinese nol è propit un salt ae puartade di ducj…
Naturalmentri, pensant a nons di int nassude chenti che e vedi puartât lustri al so paîs, al ven subit iniment Tiziano Tessitori, defont tal ‘73, che – in plui di jessi stât un dai prins baluarts dal autonomisim furlan fin de nassite de Republiche – al è stât ancje Pari Costituent e al à vût incarics prestigjôs tal Guvier nazionâl presiedût di De Gasperi: sotsegretari al Tesaur dal ‘50 al ‘53, e tal ‘60 ministri ae Riforme burocratiche. Prin furlan ministri, al è passât ae storie – fra lis altris robis – pe curiositât di jessi stât chel che al à legalizade la pene biro te firme dai contrats e dai documents publics.
Ma al è forsit tal cjamp de culture che Sedean al spiche par un grum di siei fîs. Prin di ducj, pre Davide Marie Turoldo, poete di rare sensibilitât, inteletuâl di nivel assolût e vôs libare e origjinâl tal percors di riforme de Glesie dal ‘900. E – massime cul sogjet dal film “Gli ultimi”, diret tal ‘63 di Vito Pandolfi – vêr cjantôr de umiltât, des dificoltâts, de dignitât e des sperancis de int dal mont rurâl plui puar. Une figure tant cjare ae comunitât di Sedean e a dut il Friûl, di vê trasformade la cjase dulà che al è nassût, a Coder, intun piçul ma interessantissim museu che al puarte il so non e che al è sede di une associazion culturâl.
Cussì come che predi e grant inteletuâl (e simpri sedeanot) al è stât ancje pre Gilberto Pressacco, une des figuris plui impuartantis de nestre regjon sul front dai studis musicologjics, che cul so lavôr di ricercje – purtrop interot masse adore de sô muart a dome 52 agns, tal ‘97 – al à metût sù lis fondis di dut il studi de storie de musiche in Friûl, dai siei contribûts origjinâi e des sôs implicazion cu la tradizion etnografiche dal teritori.
Doi personaçs di grant spessôr ma ancje doi predis, origjinaris di un paîs cuntune tradizion di devozion religjose profonde. Tant di vê dât ae Glesie ancje un altre impuartante figure, te persone di bonsignôr Raffaele Nogaro, cumò in pension ma fin tal ‘90 vescul di Caserte, dulà che si è segnalât par un ministeri davuelt cun grande passion, massime tai confronts dai plui debui e dai imigrâts sfrutâts.
No dome predis, dut câs, di chês bandis. Parcè che  ancje de bande de musiche Sedean al pues vantâ une vere celebritât, forsit – come che masse dispès al capite – plui famôs tal forest che chenti. No ‘nd è tancj chei che, partint de campagne de Basse Furlane, a rivin al nivel dal pianist e compositôr jazz Glauco Venier che cul so ultin disc si è meretât une nomination al Grammy Award pal miôr album jazz vocâl (tal 2008 par “Distances”, cun Klaus Gesing e Norma Winstone), e si è gjavât la sodisfazion di sunâ ae Opera di Parîs, vêr templi mondiâl de musiche.
E ancje il mont dal teatri al à il so biel contribût di bande di Sedean, par merit dal Teatro Incerto – compagnie nassude in chel di Grediscje – che al dì di vuê al rapresente une des realtâts plui vitâls dal panorame teatrâl nostran. Claudio Moretti, Fabiano Fantini, Elvio Scruzzi, tai agns a àn vût maniere di lavorâ, singolarmentri o insieme, par une infinitât di progjets (tant par nomenânt un, il fortunât “I Turcs tal Friûl” di Elio De Capitani, di Pasolini), tal ambit dal ambient morbinôs dal CSS (Teatri Stabil di Inovazion dal Friûl – Vignesie Julie, ndr). Lis comedis frescjis e inteligjentis che ogni an a puartin ator pe regjon dispès a zuin a conciliâ grancj tesç teatrâi cu la veretât de proprie provenience gjenuinementri furlane (tant che la divertente version dal Don Chisciotte di Cervantes, vivarosementri ambientade propit tai paîs de zone di Sedean).
Une voie di contâ storiis che a sedin un tic nestris ma ancje cuntun voli che al cjale lontan, che al è ancje il talent di Max Mauro, zovin gjornalist e autôr, nassût in Svuizare ma origjinari di Sedean. Dopo ve lavorât un grum te stampe locâl e vê publicât libris e articui che a esplorin i temis de migrazion, dai viaçs e de esplorazion dal mont in biciclete, des culturis zovanîls e in gjenerâl de umanitât – cumò al vîf e al lavore a Dublin, in Irlande, ma cence mai dismenteâsi di butâ un voli a ce che al sucêt te sô Furlanie.
Cussì come un lavôr impuartant, sul front de tutele de marilenghe, al è chel di un “fi di Sant Laurinç di Sedean”, Lorenzo Zanon, psicolic e za assessôr tal so Comun, za vicepresident dal Istitût Ladin Furlan “Pre Checo Placerean” e, dal 2008, nomenât de Zonte Regjonâl tant che president de ARLeF, la Agjenzie regjonâl pe lenghe furlane.
Musiche, teatri, culture, leterature, politiche: al semearès, insume, di cjatâ in Sedean un paîs une vore “cerebrâl”. Ma, a ben cjalâ, ancje il sport a nivel plui alt al à pretindût di chest paîs furlan il so tribût di talent. Tant che e je sot i voi di ducj – in cheste regjon di apassionâts di balon – la biele cariere di Massimo Donati, centricjampist nassût a Sedean e selezionât dal vivâr fertil de Atalanta, di dulà che al à vût maniere di fâsi notâ di clubs impuartants (Milan, Parma, Sampdoria, Messina, Celtic, Bari e vuê Palermo), tant di vê vude ancje la oportunitât di vistî la maie de rapresentative taliane, tacant cu la Under 16, fin ai Europeus dal 2002 cu la Under 21.
Forsit un tic mancul evident, ma parimentri prestigjose, e je la cariere sportive di Cristiano Valoppi, preseât alenadôr in fuarce ae federazion ciclistiche taliane.
E – e cheste e je une robe une vore curiose – il secont te graduatorie mondiâl dai miôr arbitris internazionâi di… sumo! Une specialitât avonde inusuâl des nestris bandis ma che e puarte Valoppi ator pal mont, par dutis lis competizions internazionâls di chest antîc sport gjaponês. In Gjapon, ma ancje a… Barcis, dulà che ogni an, propit su iniziative di Valoppi, di un pôc in ca si ten un torneu esibizion di chest sport particolâr, popolâr tal Estrem Orient tant che il balon o il baseball tal mont ocidentâl. ■
Margherita Timeus