Passant pe enesime gnove taronde, a servizi dal enesim centri comerciâl, il pinsîr al è simpri chel: ma trope tiere ise stade sacrificade tai ultins dîs, cuindis agns in Friûl par fâ gnovis stradis, zonis residenziâls, industriâls, comerciâls? Masse.
L’Istitût superiôr pe protezion e pe ricercje ambientâl (Ispra) – studiant cun scrupul i procès di trasformazion dal teritori – nus al ricuarde ogni an. Di un biel toc, al met il Friûl-Vignesie Julie tra i prins puescj in Italie par consum di tiere (e une posizion di vertiç la regjon le à ancje par superficie di vendite de grande distribuzion), cun valôrs che a rivin scuasi al 9% a pet de superficie teritoriâl complessive (la medie europeane e je parsore dal 4%) e che no si puedin justificâ cu la cressite demografiche, che, si sa, no je.
Ce vuelial dî? Che ogni an a vegnin “mangjadis” desenis di etars di plui di chel prime, e no dome in citât. E la liende no je cambiade cu la gnove normative regjonâl in materie, volude de Zonte Serracchiani.
O sin lontans dal centrâ l’obietîf dal consum zero di tiere che tancj aministradôrs, a plui nivei, a àn fevelât: marketing teritoriâl di un teritori che nol sarà plui, lant indevant cussì. No stin a dismenteâ che la plui part dai terens destinâts ae urbanizazion a son i miôr, chei di planure e plui produtîfs, tant che a àn denunziât cetantis voltis lis organizazions di categorie dai agricultôrs. E no stin nancje a dismenteâ i servizis ecosistemics preziôs peâts al stât naturâl de tiere (mitigazion dal clime, mantigniment dai ecuilibris idrogjeologjics, miorament de cualitât dal aiar…).
Un gnûf svilup al è pussibil (che lu tegnin a ments i gnûfs aministradôrs locâi, sielts dai citadins tes elezions resintis, e i lôr tecnics), rispietôs ancje dal ambient dulà che si vîf, che al è un valôr multidimensionâl – ben comun, dirit individuâl, interès de comunitât – e al impegne ducj: singui, associazions, istituzions. Imponie o no une riflession il fat – pandût di resint simpri dal Ispra – che in regjon o vin la presince di pesticidis, in superficie e sot tiere, plui alte de Italie?
I vûl un gnûf svilup, al è necessari, e che al sedi rispietôs dal paisaç, ven a stâi il “prodot” storic e culturâl li che a lavorin intune nature e om, impuarît simpri plui ancje in Friûl e menaçât di progjets calâts dal alt o che a passin cu la complicitât o la inerzie de politiche (eletrodots, superstradis, cimentificazion di aghis…). Il paisaç nol è dome chel piturât tai cuadris o il fonts par fâsi un selfie, al è chel che al sta ator di nô, chel li che o sin nassûts, che o cjapìn fuarce, come che le cjapìn de memorie de nestre infanzie, de nestre zoventût. Distruzilu al è come pierdi la nestre memorie, la nestre identitât.
di Erika Adami
